சென்னை: தமிழில் ‘துப்பறிவாளன்’, ‘அயோக்யா’, ‘சவரக்கத்தி’, ‘துர்கா’, ‘லியோ’, ‘டென் ஹவர்ஸ்’, தெலுங்கில் ‘கேம் சேஞ்சர்’, இந்தியில் ‘சிக்கந்தர்’ போன்ற படங்களுக்கு ஒளிப்பதிவு செய்தவர், ஜெய் கார்த்திக். அவர் கூறியதாவது: சிறுவயது முதலே போட்டோக்கள் மீது அளவுகடந்த காதல் கொண்ட நான், இளைஞனாக இருந்தபோது ஏற்பாடு செய்த புகைப்பட கண்காட்சியை திறந்து வைத்த இயக்குனர் மணிரத்னம் என்னை பாராட்டி, ஒளிப்பதிவாளர் பி.சி.ஸ்ரீராமிடம் அறிமுகம் செய்து வைத்தார். ‘யாவரும் நலம்’ முதல் ‘ஐ’ படம் வரை பி.சி.ஸ்ரீராமிடம் உதவியாளராக பணியாற்றி, ஒளிப்பதிவு பற்றிய நுணுக்கங்களை கற்றுக்கொண்டேன். 100க்கும் மேற்பட்ட விளம்பர படங்களுக்கு ஒளிப்பதிவு செய்து, அதில் சில படங்களை இயக்கிய நான், மிஷ்கின் இயக்கத்தில் விஷால் நடித்த ‘துப்பறிவாளன்’ படத்தின் மூலம் ஒளிப்பதிவாளராக அறிமுகமானேன். ஒளிப்பதிவில் இன்னும் பல புதுமைகளை புகுத்த விரும்புகிறேன். விரைவில் முழுநீள திரைப்படத்தை இயக்கவும் திட்டமிட்டுள்ளேன்.