மாருதி இயக்கத்தில் பிரபாஸ், மாளவிகா மோகனன், நிதி அகர்வால், ரித்தி குமார், சஞ்சய் தத், ஜரீனா வஹாப், போமன் இரானி நடித்துள்ள பான் இந்தியா படம், ‘தி ராஜா சாப்’. தமன் இசை அமைத்துள்ளார். காமெடி கலந்த ஹாரர் படமாக உருவாகியுள்ள இது, வரும் ஜனவரி 9ம் தேதி மற்ற மொழிகளிலும், ஜனவரி 10ம் தேதி தமிழிலும் திரைக்கு வருகிறது. இதை முன்னிட்டு ஐதராபாத்தில் நடந்த நிகழ்ச்சியில் பிரபாஸ் பேசுகையில், ‘எப்போதுமே நான் மாஸான, ஆக் ஷன் கலந்த பொழுதுபோக்கு படங்களிலேயே நடிக்கிறேன். டைரக்டர் மாருதியிடம் கலர்ஃபுல்லான பொழுதுபோக்கு கதை ஒன்றை கேட்டேன். உடனே அவர் காமெடியுடன் கூடிய ஹாரர் கதையை சொன்னார். கண்டிப்பாக இந்த படம் ரசிகர்களை ஆச்சரியப்படுத்தும். இது பாட்டி, பேரன் கதை. பாட்டியாக ஜரீனா வஹாப் நடித்துள்ளார்.
படத்தின் நிஜ ஹீரோ, தயாரிப்பாளர் விஸ்வபிரசாத். திட்டமிட்டிருந்த பட்ஜெட்டை மீறி, கடந்த மூன்று வருடங்களாக படப்பிடிப்பு நடத்தினோம். அதனால் நாங்கள் மிகவும் பயந்தோம். ஆனால், தயாரிப்பாளர் மட்டும் எதற்கும் பயப்படவில்லை. கிளைமாக்ஸ் வேறுவிதமாக இருக்கும். அதை மாருதி பேனாவால் எழுதினாரா, இயந்திர துப்பாக்கியால் எழுதினாரா என்று தெரியவில்லை. இதற்கு முன்பு பார்த்திருக்காத புதிய கிளைமாக்ஸாக ரசிகர்களை மகிழ்விக்கும். எனது படம் ரிலீசாகும் நாளில் சீனியர்களின் படங்களும் வருகிறது. அவர்களிடம் இருந்து நிறைய விஷயங்களை கற்றுக்கொண்டேன். அவர்களின் படங்கள் வெற்றிபெற வேண்டும். அவர்களின் படங்களுடன் எனது படமும் வெற்றிபெற்றால் அதிக மகிழ்ச்சி அடைவேன்’ என்றார்.