தூத்துக்குடி, பிப்.19: மருத்துவ சமுதாயத்தினருக்கு எம்பிசி பட்டியலில் 5 சதவீத இடஒதுக்கீடு வழங்க வேண்டும் என தூத்துக்குடியில் நடந்த தமிழ்நாடு முடிதிருத்தும் அழகு கலை தொழிலாளர்கள் நலச்சங்க பொதுக்குழு கூட்டத்தில் தீர்மானம் நிறைவேற்றப்பட்டது. தமிழ்நாடு முடிதிருத்தும் அழகு கலை தொழிலாளர்கள் நலச்சங்கம் மற்றும் மருத்துவர் சமுதாய பேரவை சார்பில் மாவட்ட பொதுக்குழு கூட்டம் தூத்துக்குடியில் நடந்தது. கூட்டத்திற்கு மாநில தலைவர் பழனி தலைமை வகித்தார். மாநில பொதுச்செயலாளர் சுப்பிரமணியன், மாநில ஒருங்கிணைப்பாளர் பன்னீர்செல்வம், தொழிலாளர் நலவாரிய உறுப்பினர் தினகரன் ஆகியோர் முன்னிலை வகித்தனர். கூட்டத்தில் தூத்துக்குடி மாவட்டத் தலைவராக பசுவந்தனை இசக்கிமுத்து, மாவட்டச் செயலாளராக விஜயகுமார், பொருளாளராக பாண்டியன், துணைத் தலைவராக சுடலைமணி, அமைப்பாளராக நல்லதம்பி, துணைச் செயலாளராக ராஜ்குமார், துணை அமைப்பாளராக ராஜதுரை, மாநில துணைச் செயலாளராக மனோகரன், தென்மண்டல அமைப்பாளராக செல்வராஜ், மாவட்ட இளைஞரணி தலைவராக மாரிமுத்து, செயலாளராக பகத்சிங், அமைப்பாளராக மகாலிங்கம், துணைச் செயலாளராக கோமதிராஜ், பால்முருகன், பெரியசாமி தேர்வு செய்யப்பட்டனர்.