சென்னை: தனது பேச்சு சர்ச்சையானதால் அது பற்றி நடிகர் சுரேஷ் கோபி விளக்கம் அளித்துள்ளார். தமிழில் தீனா, சமுத்திரம், ஐ உள்பட பல படங்களில் நடித்தவர் சுரேஷ் கோபி. மலையாளத்தில் முன்னணி ஹீரோவான இவர் பாஜவில் இணைந்து, ராஜ்யசபா எம்.பியாகவும் இருக்கிறார். அவ்வப்போது ஆன்மிக நிகழ்ச்சிகளில் பங்கேற்கும் இவர், அது தொடர்பான தனது கருத்துகளை பேசி வருகிறார். இதுபோல் சமீபத்தில் ஒரு நிகழ்ச்சியில் பங்கேற்றார். அதில், சுரேஷ் கோபி பேசும் வீடியோ வெளியானது. அந்த வீடியோவில், ‘கடவுள் நம்பிக்கை இல்லாதவர்கள் அழிந்துபோவார்கள்’ என சுரேஷ் கோபி பேசுவது போல் அமைந்துள்ளது.

இந்நிலையில் இது பற்றி விளக்கம் அளித்து சுரேஷ் கோபி கூறியிருப்பது:

நான் என்ன பேசினேன், எதற்காக பேசினேன் என புரியாமல், அது பற்றி தெரிந்துகொள்ளாமல், எனது பேச்சை சிலர் திரித்துள்ளனர். இந்த முழு பேச்சையும் வெட்டி அதை இதுபோல் ஜோடித்திருக்கிறார்கள். கடவுள் நம்பிக்கையே இல்லாதவர்களையும் நான் மதிக்கிறேன். யாரை பற்றியும் தவறாக பேசவில்லை. இது என்னை பிடிக்காதவர்கள் செய்திருக்கும் வேலை. இவ்வாறு அவர் கூறினார்.