சென்னை: பாலா இயக்கத்தில் விக்ரம் நடித்த படம் ‘சேது’. இதில் சிவகுமார், அபிதா, ஸ்ரீமன், ஜோதிலட்சுமி, மனோபாலா, மோகன் வைத்யா உள்ளிட்டோர் நடித்திருந்தனர். இன்றைய பிரபலமான இயக்குனர்களும், தயாரிப்பாளர்களும், நடிகர்களுமான அமீர், சசிகுமார் ஆகியோர் சிறிய வேடங்களில் நடித்திருந்தனர். ஆர்.ரத்னவேலு ஒளிப்பதிவு செய்ய, இளையராஜா இசை அமைத்தார். ஸர்மதா புரொடக்‌ஷன்ஸ் சார்பில் ஏ.கந்தசாமி தயாரித்தார். இப்படம் மிகப்பெரிய வெற்றிபெற்றது.

விமர்சன ரீதியாகவும், வசூல் ரீதியாகவும் கொண்டாடப்பட்டது. மேலும், பல்வேறு மொழிகளிலும் ரீமேக் செய்யப்பட்டது. தேசிய விருது உள்பட பல்வேறு விருதுகளை வென்றது. தமிழ் சினிமாவின் டிரெண்ட் செட் படங்களில் ஒன்றாக இருந்து வரும் ‘சேது’ படம், விக்ரம் என்ற முன்னணி ஹீரோவை தமிழ் திரையுலகிற்கு கொடுத்துள்ளது. தற்போது இப்படத்தை அதிநவீன தொழில்நுட்பத்தில் புதுப்பிக்கும் பணிகள் நடந்து வருகிறது. வரும் டிசம்பர் 10ம் தேதி இப்படம் திரைக்கு வந்து 26 ஆண்டுகள் நிறைவடைகிறது. இதை முன்னிட்டு படத்தை வெளியிட படக்குழு முடிவு செய்துள்ளதாக தகவல் வெளியாகியுள்ளது. இந்த அறிவிப்பு விக்ரம் ரசிகர்களை மகிழ்ச்சியடைய வைத்துள்ளது.