சென்னை: ‘துடரும்’ படத்தின் தொடர் வசூல் அதிகரிப்பால் படக்குழு மகிழ்ச்சியில் உள்ளது. இந்நிலையில் இப்படம் நாளை முதல் தமிழிலும் வெளியாகிறது. ஏப்ரல் 25-ம் தேதி தருண் மூர்த்தி இயக்கத்தில் மோகன்லால், ஷோபனா நடிப்பில் வெளியான மலையாள படம் ‘துடரும்’. எந்தவித எதிர்பார்ப்பும் இல்லாமல், விளம்பரப்படுத்துதலும் இல்லாமல் இப்படம் வெளியானது. முதல் நாள் முதல் காட்சி முடிந்தவுடன், இப்படத்தின் வசூல் வேட்டை தொடங்கியது. தற்போது வரை கேரளாவில் மட்டும் ரூ.85 கோடி வசூலைத் தாண்டியிருக்கிறது.

கேரளாவில் அதிக வசூல் செய்த படங்களில் 8-வது இடத்தைப் பிடித்திருக்கிறது. ‘பிரேமலு’ படத்தின் வசூலை முறியடித்து 8-வது இடத்துக்கு முன்னேறி இருக்கிறது. மேலும் ஆந்திரா, தெலங்கானாவில் தொடர்ச்சியாக 11 நாட்களில் ரூ.5 கோடி வசூலை கடந்திருக்கிறது. வெளிநாடுகளிலும் வசூல் வேட்டை நடத்தி வருகிறது. மொத்தமாக உலகம் முழுவதும் ரூ.170 கோடி வசூலித்துவிட்டது. இந்நிலையில் தொடரும் என்ற பெயரில் டப் செய்யப்பட்டு நாளை முதல் தமிழகத்தில் தியேட்டர்களில் ரிலீசாகிறது.