தர்மபுரி, டிச.18: தர்மபுரி மாவட்டத்தில் ஊரக உள்ளாட்சிகளில் போட்டியிட தாக்கல் செய்துள்ள 10,647 பேரின் வேட்புமனுக்கள் பரிசீலனை செய்யப்பட்டன. இதையடுத்து, அனைத்து பிடிஓ அலுவலகங்கள் முன்பும் ஏராளமானோர் திரண்ட நிலையில், நாளை(19ம் தேதி) இறுதி வேட்பாளர் பட்டியல் அறிவிக்கப்பட உள்ளது. தமிழகத்தில் உள்ளாட்சி தேர்தல் வரும் 27ம் தேதி மற்றும் 30ம் தேதி என இரண்டு கட்டங்களாக நடக்கிறது. இதையொட்டி, கடந்த 9ம் தேதி வேட்புமனு தாக்கல் துவங்கியது. 16ம் தேதி வேட்பு மனு தாக்கல் முடிந்தது. தர்மபுரி மாவட்டத்தில் 9ம் தேதி 107 பேரும், 10ம் தேதி 72 பேரும், 11ம் தேதி 416 பேரும்,  12ம் தேதி 591 பேரும், 13ம் தேதி  2323 பேரும், 14ம் தேதி 1486 பேரும், 16ம் தேதி 5,649 பேரும் வேட்பு மனு தாக்கல் செய்திருந்தனர். கடந்த 9ம் தேதி முதல் நேற்று முன்தினம் வரையிலும் 7 வேலை நாட்களில் மொத்தம் 10 ஆயிரத்து 647 பேர் தங்கள் வேட்பு மனுக்களை தாக்கல் செய்துள்ளனர். இந்த மனுக்கள் மீதான பரிசீலனை நேற்று காலை 10 மணிக்கு அந்தந்த ஊராட்சி ஒன்றிய அலுவலகங்களில் நடைபெற்றது. முன்னதாக காலை 9 மணி முதல் வேட்புமனு செய்தவர்கள் மற்றும் ஆதரவாளர்கள் அலுவலங்கள் முன்பாக திரண்டனர். பின்னர் தங்களது வேட்பு மனுக்கள் பரிசீலனைக்கு எடுத்துக் கொள்ளப்பட்டதா என காத்திருந்து தெரிந்து கொண்டனர். மனுக்கள் பரிசீலனை இன்றும் நடைபெற உள்ளது.

இந்நிலையில், தர்மபுரி மாவட்ட உள்ளாட்சித் தேர்தல் பார்வையாளராக நியமிக்கப்பட்டுள்ள ராஜேஷ் நேற்று பாலக்கோடு, காரிமங்கலம் பிடிஓ அலுவலகங்களில் ஆய்வு செய்து, வேட்பு மனுக்கள் மீதான பரிசீலனைகளை பார்வையிட்டார். நாளை(19ம் தேதி) வேட்புமனுக்களை வாபஸ் பெற்றுக்கொள்ளலாம். அன்றைய தினம் மாலையே இறுதி வேட்பாளர் பட்டியல் அறிவிக்கப்படும். வேட்பாளர்களின் பிரசாரத்திற்கு பின்னர்  தர்மபுரி மாவட்டத்தில் தர்மபுரி, நல்லம்பள்ளி, அரூர், கடத்தூர், பாப்பிரெட்டிப்பட்டி ஆகிய ஒன்றியங்களில் உள்ள உள்ளாட்சி பொறுப்புகளுக்கு 27ம் தேதி முதற்கட்டமாகவும், பென்னாகரம், ஏரியூர், காரிமங்கலம், மொரப்பூர், பாலக்கோடு ஆகிய ஒன்றியங்களில் 30ம் தேதி 2ம் கட்டமாகவும் தேர்தல் நடக்கிறது. வாக்கு எண்ணிக்கை வரும் ஜனவரி 2ம் தேதி நடக்கிறது.  மாவட்ட ஒன்றியக்குழு துணைத்தலைவர்களுக்கான மறைமுக தேர்தல் வரும் ஜனவரி 11ம் தேதி நடக்கிறது. கிராம ஊராட்சிகளுக்கு தேர்தல் முடிந்த பின்னர், பிப்ரவரி மாதம் நகராட்சி, பேரூராட்சிகளுக்கு தேர்தல் நடைபெற உள்ளது.