(11.6.2026 முதல் 17.6.2026 வரை)

சாதகங்கள்: ராசிக்கு உடைய செவ்வாயே ஆறில் இருப்பதால், கவலைப்பட வேண்டியது இல்லை. ஆறில் ஆட்சி என்பதால், பகை விலகும். வழக்குகள் சாதகமாகும். தன பஞ்சமாதிபதி, ஏழாம் அதிபதி சுக்கிரனோடு இணைந்து, கடகத்தில் இருந்து உங்கள் தன ராசியைப் பார்ப்பதால், பொருளாதார ஏற்றம் உண்டு. திருத்தல பயணங்கள் உண்டு. கேது உங்களுக்குச் சாதகமாக இருப்பதால், ஆன்மிக விஷயங்களில் அதிக ஈடுபாடு காட்டுவீர்கள். நீங்கள் எதிர்பார்க்காத இடத்திலிருந்து உதவிகள் கிடைக்கும். கொடுக்கல் வாங்கல்கள் சிறப்பாக இருக்கும். பழைய பாக்கிகள் வசூலாகும். புதிய ஒப்பந்தங்கள் கிடைக்கும். உங்களுக்கு கீழ் வேலை செய்பவர்கள் அனுபவம், உங்கள் வெற்றிக்குக் கை கொடுக்கும். மேலதிகாரிகளின் பாராட்டு உண்டு.

கவனம் தேவை: ஏழிலும் எட்டிலும் சூரியன் இருக்கிறார். அஷ்டம புதன், அர்த்தாஷ்டம ராகு என சில கிரகங்கள் மனரீதியான இடர்களைத் தரும் அமைப்பில் இருப்பதால். சில விஷயங்கள் முடிக்க முடியாமல் தடுமாற நேரும். சகோதர வகையில் கருத்து வேறுபாடுகள் வந்து போகும்.

சந்திராஷ்டமம்: 15.6.2026 காலை 8.42 முதல் 17.6.2026 காலை 8.13 வரை சந்திராஷ்டமம் உண்டு. பேச்சில் கவனமாக இருக்கவும். வாதப் பிரதிவாதங்களில் ஈடுபடவேண்டாம்.

பரிகாரம்: மாலை வேளையில் அருகாமையில் உள்ள சிவாலயம் சென்று, அம்பாளையும் சிவனையும் வணங்கி வாருங்கள்.