சிற்பமும் சிறப்பும்

ஆலயம்: தஞ்சாவூர் – கும்பகோணம் சாலையில் பசுபதி கோயில் அருகே புள்ளமங்கை பிரம்மபுரீஸ்வரர் கோயில் உள்ளது.

காலம்: தற்போதைய வடிவத்தில் உள்ள கோயில் முதலாம் பராந்தக சோழன் (907-955) ஆல் நியமிக்கப்பட்டது.

புள்ளமங்கை பிரம்மபுரீஸ்வரர் கோயில் தமிழ்நாட்டில் உள்ள அற்புதமான புடைப்புச் சிற்பங்கள் மற்றும் நுண்ணிய சிற்பங்கள் கொண்ட கோயில்களில் ஒன்றாகும்.

திருஞானசம்பந்தரால் ‘தேவாரம்’ பாடப்பட்ட தலமாதலால், பொ.ஆ. ஏழாம் நூற்றாண்டிலிருந்தே இவ்வாலயத்தின் இருப்பை அறியலாம். சோழர் கட்டிடக்கலைக்கு சிறந்த எடுத்துக்காட்டாக விளங்கும் இவ்வாலயம், முதலாம் பராந்தக சோழன் (907-955) காலத்தில் புதுப்பிக்கப்பட்டது. சிவபெருமான் ஆலந்துறைநாதர் (பிரம்மபுரீஸ்வரர்/ புள்ளமங்கலத்து மகாதேவர்) என்று வணங்கப்படுகிறார். இறைவி அல்லியங்கோதை (சௌந்தரநாயகி).

கருவறையின் வெளிப்புறச் சுவர்கள் வடக்கில் விஷ்ணு மற்றும் பிரம்மாவுடன் லிங்கோத்பவர், தெற்கில் தட்சிணாமூர்த்தி மற்றும் மேற்கில் பிரம்மா ஆகியோரின் நேர்த்தியான புடைப்பு சிற்பங்களால் செழுமைப்படுத்தப்பட்டுள்ளன. அர்த்த மண்டபத்தின் தெற்கே கோஷ்டத்தில், கணபதி கணங்கள் சூழ காட்சியளிக்கிறார். வடக்குப் பகுதியில் நேர்த்தியான வடிவில் துர்க்கை வீற்றிருக்கிறார்.

சங்கு, சக்கரம், வாள், வில், திரிசூலம் மற்றும் கேடயம் ஆகிய ஆயுதங்களை ஏந்தியபடி மேலே குடையுடன் எருமை தலையின் மீது நின்றவாறு காட்சியளிக்கும் துர்க்கை /மகிஷாசுரமர்த்தினியின் சிற்பத்தின் பேரெழில் புகழ்மிக்கது. துர்க்கையின் இருபுறமும் உள்ள சுயதியாகம் செய்து தங்கள் உயிரை தந்துள்ள ‘அரிகண்டம்’ ‘நவகண்டம்’ புடைப்பு சிற்பங்கள் குறிப்பிடத்தக்கவை. மான், சிங்கம் ஆகிய விலங்குகள் இருபுறமும் உள்ளன. ‘அரிகண்டம்’ என்பது இறைக்கு தன்னுடைய தலையை ஒரே வெட்டில் அரிந்து சமர்ப்பிப்பதாகும்.

இந்த முறையில் தலையை ஒரு கையால் பிடித்துக் கொண்டோ, தலையை ஓரிடத்தில் இழுத்துக் கட்டியோ மறுகையால் வாள் கொண்டு கழுத்தினை அறுத்து பலி தந்தனர். ‘நவகண்டம்’ என்பதன் பொருள் ‘நவம்’ – ஒன்பது, ‘கண்டம்’ – துண்டங்கள். ஒரு வீரர் தம் உடலை 9 துண்டங்களாகத் தாமே வெட்டிக்கொண்டு உயிர் துறப்பது.

தொகுப்பு: மது ஜெகதீஷ்

The post புள்ளமங்கை துர்க்கை appeared first on Dinakaran.