சென்னை: சென்னை இந்தியன் வங்கியின் தலைமை நிர்வாக இயக்குனர் எஸ்.எல்.ஜெயின் அறிக்கையை வெளியிட்டார். அப்போது பேசிய அவர் கூறியதாவது: கடந்தாண்டு ஜூன் மாதத்துடன் ஒப்பிடும்போது இந்தியன் வங்கியின் நிகர லாபம் 41 சதவீதம் அதிகரித்துள்ளது. அதேபோல் கடந்த ஆண்டு (ஜூன் 2022) ரூ.1,213 கோடியாக இருந்த வங்கியின் நிகர லாபம் இந்த நிதி ஆண்டில், அதாவது ஜூன் 2023 முடிவில் ரூ.1,709 கோடியாக அதிகரித்துள்ளது. இது கடந்தாண்டை ஒப்பிடும்போது 41 சதவீதம் உயர்ந்துள்ளது. அதேபோல் ஜூன் மாதம் 2022ல் ரூ.10,09,454 கோடியாக இருந்த வங்கியின் மொத்த வர்த்தக மதிப்பு 2023ம் ஆண்டு ஜூனில் 9 சதவீதம் அதிகரித்து ரூ.11,00,943 கோடியாக உயர்ந்துள்ளது.

மேலும் கடந்த நிதி ஆண்டில் ரூ.4534 கோடியாக இருந்த நிகர வட்டி வருவாய் இந்த நிதியாண்டு ரூ.5703 கோடி ஆக உயர்ந்துள்ளது. இது கடந்தாண்டை ஒப்பிடும்போது 26 சதவீதம் அதிகம். மேலும் மொபைல் பேங்கிங் உபயோகிக்கும் பயனாளர்களின் எண்ணிக்கை 36 சதவீதம் உயர்ந்துள்ளது, யூபிஐ மற்றும் ஆன்லைன் பண வர்த்தனை பயனாளர்கள் 33 சதவீதத்திலிருந்து 85 சதவீதமாக உயர்ந்துள்ளது. 59 லட்சம் மகளிர் சுய உதவிக் குழுக்கள் கணக்கு உள்ளன, ஒவ்வொரு குழுவுக்கும் ரூ.20 லட்சம் வரை கடன் வழங்குகிறோம். தங்க நகை கடனில் நாளொன்றுக்கு ரூ.200 கோடி வணிகம் நடைபெறுகிறது. 85 சதவீத வங்கி சார்ந்த வணிகம் டிஜிட்டல் மையம் ஆகிவிட்டது. ஆண்டுதோறும் அனைத்து பிரிவுகளிலும் இந்தியன் வங்கி வளர்ச்சி அடைந்து வருகிறது.

The post இந்தியன் வங்கியின் நிகர லாபம் 41 சதவீதம் அதிகரிப்பு appeared first on Dinakaran.