மும்பை: பாலிவுட் முன்னணி நடிகர் ஷாருக்கானுக்கு கடந்த 2023ல் மூன்று பான் இந்தியா படங்கள் திரைக்கு வந்தன. `பதான்’, `ஜவான்’, `டன்கி’ ஆகிய படங்கள் பெரிய ஹிட்டாகி வசூலையும் குவித்தன. கடந்த 2024ல் ஷாருக்கான் நடித்த எந்த படமும் ரிலீசாகவில்லை. ஆனால், அடுத்து அவர் நடிக்கும் படங்களைப் பற்றிய செய்தி மட்டும் வெளியாகி வருகின்றன. தங்கள் அபிமான நடிகர் ஷாருக்கான் நடித்த படங்கள் வரவில்லையே என்று வருந்திய பல ரசிகர்கள், `முஃபாசா’ படத்தின் இந்திப் பதிப்பில் ஷாருக்கான் டப்பிங் பேசி இருந்ததை ரசித்தார்கள். இதையடுத்து `கிங்’ என்ற இந்திப் படத்தில் ஷாருக்கான் நடிப்பதாக தகவல் வெளியானது. இதை சுஜாய் கோஷ் இயக்குகிறார் என்று கூறப்பட்டதே தவிர, யாரும் உறுதி செய்யவில்லை.

இதுகுறித்து துபாயில் நடந்த நிகழ்ச்சி ஒன்றில் ஷாருக்கான் பேசுகையில், `இன்னும் சில மாதங்களில் மும்பைநகரில் படப்பிடிப்புகள் தொடங்க உள்ளது. படத்தின் இயக்குனரான சித்தார்த் ஆனந்த், மிகவும் கண்டிப்பானவர். இதற்கு முன்பு நான் நடித்த `பதான்’ என்ற படத்தை இயக்கி இருந்தார். எனவேதான் அவர் மிகவும் கண்டிப்பானவர் என்று நான் சொல்கிறேன். படத்தைப் பற்றி எந்த விஷயத்தையும் வெளியே சொல்ல வேண்டாம் என்று கண்டிப்புடன் அவர் சொல்லி இருக்கிறார். எனவே, நான் நடிக்கும் அடுத்த படத்தைப் பற்றி எந்த விஷயத்தையும் சொல்ல முடியாது. ஆனால், ஒரு விஷயம் மட்டும் உறுதி. இந்தப் படம் நிச்சயமாக அனைத்து தரப்பு ரசிகர்களையும் கவரும்’ என்றார். பிறகு அவர் தனது பாடல்களுக்கு துள்ளலாக நடனம் ஆடினார். இதனால் ரசிகர்கள் உற்சாகம் அடைந்தனர். ஷாருக்கானும் மகிழ்ந்தார்.