நாமகிரிப்பேட்டை. ஜன.22: நாமகிரிப்பேட்டை மற்றும் சுற்றுவட்டார பகுதிகளில் மருத்துவ குணம் கொண்ட கோலியாஸ் கிழங்கு சாகுபடியில் விவசாயிகள் ஆர்வம் காட்டி வருகின்றனர். பாரம்பரிய மருத்துவத்தில் முக்கிய இடம் பிடித்துள்ள கோலியாஸ் கிழங்கு, உடல் வலிமை அதிகரிப்பு, ஜீரண கோளாறுகள் சரிசெய்தல், மூலநோய் உள்ளிட்ட பல்வேறு நோய்களுக்கு மருந்தாகப் பயன்படுவதால் சந்தையில் நல்ல வரவேற்பைப் பெற்றுள்ளது. குறைந்த நீர் தேவையும், குறுகிய காலத்தில் விளையும் தன்மையும் கொண்ட கோலியாஸ் கிழங்கு, வறட்சி பாதிப்புகள் அதிகம் உள்ள நாமகிரிப்பேட்டை பகுதிக்கு ஏற்ற பயிராக விளங்குகிறது. மணல் கலந்த செம்மண் நிலங்களில் இந்தக் கிழங்கு செழித்து வளரும் என்பதால், பாரம்பரிய பயிர்களை விட கூடுதல் வருமானம் கிடைப்பதாக விவசாயிகள் தெரிவிக்கின்றனர்.

தற்போது, உள்ளூர் சந்தைகள் மட்டுமின்றி ஈரோடு, சேலம், கோவை உள்ளிட்ட மாவட்டங்களுக்கும் கோலியாஸ் கிழங்கு அனுப்பப்படுகிறது. மேலும், சித்த மருத்துவம் மற்றும் ஆயுர்வேத மருந்து தயாரிப்பு நிறுவனங்களின் தேவையும் அதிகரித்து வருவதால், விலை நிலையாக இருப்பது விவசாயிகளுக்கு ஊக்கமாக உள்ளது. ஒரு ஏக்கரில் சராசரியாக 8 முதல் 10 டன் வரை மகசூல் கிடைப்பதால் நல்ல லாபம் ஈட்டி வருவதாக விவசாயிகள் தெரிவிக்கின்றனர். வேளாண்மை துறையினரும் கோலியாஸ் கிழங்கு சாகுபடிக்கான தொழில்நுட்ப ஆலோசனைகள் வழங்கி வருகின்றனர். இயற்கை உரங்கள் பயன்படுத்தி சாகுபடி மேற்கொண்டால் கூடுதல் மகசூல் கிடைக்கும் என அறிவுறுத்தப்படுகிறது. வரும் காலத்தில் நாமகிரிப்பேட்டையில் கோலியாஸ் கிழங்கு சாகுபடி பரப்பளவு மேலும் அதிகரிக்கும் என விவசாயிகள் நம்பிக்கை தெரிவித்தனர்.