சென்னை: தமிழ்நாட்டில் கிறிஸ்துமஸ் விழா நேற்று கோலாகலமாக கொண்டாடப்பட்டது. தேவாலயங்களில் நள்ளிரவு திருப்பலி நிகழ்ச்சியில் லட்சக்கணக்கானோர் பங்கேற்று பிரார்த்தனை செய்தனர். தமிழ்நாடு முழுவதும் கிறிஸ்துமஸ் விழா நேற்று கோலாகலமாகக் கொண்டாடப்பட்டது. தேவாலயங்களில் நடைபெற்ற சிறப்புப் பிரார்த்தனைகளில் மதங்களைக் கடந்து பலரும் பங்கேற்றனர். தமிழகத்தின் தலைநகரான சென்னையில், இயேசு கிறிஸ்துவின் பிறப்பை அறிவிக்கும் கிறிஸ்துமஸ் பண்டிகை இன்று மிகச் சிறப்பான முறையில் கொண்டாடப்பட்டது. நகரின் பழமையான மற்றும் வரலாற்றுச் சிறப்புமிக்க தேவாலயங்களில் நள்ளிரவு முதலே ஆயிரக்கணக்கான மக்கள் திரண்டு சிறப்புப் பிரார்த்தனைகளில் ஈடுபட்டனர்.

சென்னையின் மிக முக்கியமான அடையாளமான சாந்தோம் பேராலயத்தில் நள்ளிரவு 11.30 மணிக்கு சிறப்புத் திருப்பலி தொடங்கியது. இயேசு கிறிஸ்துவின் 12 சீடர்களில் ஒருவரான புனித தோமையாரின் கல்லறை மீது கட்டப்பட்ட இந்த ஆலயத்தில், ஆயிரக்கணக்கான கிறிஸ்தவர்கள் வெள்ளை உடை அணிந்து பங்கேற்றனர். ஆலயத்தின் உட்புறம் மற்றும் வெளிப்புறம் கண்கவர் வண்ண விளக்குகளால் அலங்கரிக்கப்பட்டிருந்தது. உலக அமைதிக்காகவும், மக்கள் நல்வாழ்விற்காகவும் இங்கு சிறப்புப் பிரார்த்தனைகள் மேற்கொள்ளப்பட்டன.

பெசன்ட் நகர் அன்னை வேளாங்கண்ணி மாதா ஆலயத்தில், கிறிஸ்தவர்கள் மட்டுமின்றி பிற மதத்தினரும் பெருமளவில் திரண்டனர். நள்ளிரவில் மாதா சிலைக்கு சிறப்பு ஆராதனைகள் செய்யப்பட்டு, குழந்தை இயேசுவின் பிறப்பு அறிவிக்கப்பட்ட போது மக்கள் ஒருவருக்கொருவர் வாழ்த்துகளைப் பரிமாறிக் கொண்டனர். இங்குள்ள பிரம்மாண்டமான குடில் பொதுமக்களின் கவனத்தை ஈர்த்தது. புனித தோமையார் வாழ்ந்த குகை அமைந்துள்ள சின்னமலை திருத்தலத்திலும், அவர் மறைசாட்சியாக உயிர்நீத்த பரங்கிமலையிலும் விசேஷ ஆராதனைகள் நடைபெற்றன. மலை உச்சியில் அமைந்துள்ள தேவாலயத்தில் இருந்து சென்னை மாநகரத்தின் மின்னொளி காட்சியை ரசித்தபடி மக்கள் இறைவனை வழிபட்டனர்.

அதே போல், கதீட்ரல் சாலையில் அமைந்துள்ள 200 ஆண்டுகள் பழமையான இந்த ஆலயத்தில், கிறிஸ்துமஸ் பாடல்கள் மிக கம்பீரமாகப் பாடப்பட்டன. இதன் தனித்துவமான கட்டிடக்கலை மற்றும் அமைதியான சூழலில் நடைபெற்ற ஆராதனையில் ஏராளமான வெளிநாட்டினரும், உள்ளூர் மக்களும் கலந்துகொண்டனர். பாரம்பரியம் மாறாமல் ஜார்ஜ் டவுன் பகுதியில் உள்ள பழமையான தேவாலயங்களில் பழங்கால முறைப்படி மணி அடிக்கப்பட்டு, கிறிஸ்து பிறப்பு கொண்டாடப்பட்டது. சென்னை முழுவதும் உள்ள சிறிய மற்றும் பெரிய தேவாலயங்களில் மின்விளக்கு அலங்காரங்கள், பிரம்மாண்டமான நட்சத்திரங்கள் மற்றும் கிறிஸ்துமஸ் மரங்கள் வைக்கப்பட்டிருந்தன.

தேவாலய வளாகங்களில் ‘கிறிஸ்துமஸ் தாத்தா’ வேடமணிந்தவர்கள் குழந்தைகளுக்கு இனிப்புகளை வழங்கி மகிழ்வித்தனர். கிறிஸ்துமஸ் பண்டிகையை முன்னிட்டு சென்னையில் உள்ள அனைத்து முக்கிய தேவாலயங்களிலும் பலத்த போலீஸ் பாதுகாப்பு போடப்பட்டிருந்தது. போக்குவரத்து நெரிசலைக் குறைக்க சிறப்பு ஏற்பாடுகள் செய்யப்பட்டிருந்தன. சென்னை முழுவதும் சுமார் 8000 போலீசார் பாதுகாப்பு பணியில் ஈடுபட்டனர். கிறிஸ்துமஸ் விழாவையொட்டி வேளாங்கண்ணியில் 400 அடி நீளம் 60 அடி அகலத்தில் ஒரு லட்சத்து 16 ஆயிரம் மின்விளக்குகளை கொண்டு பிரமாண்ட பந்தல் அமைக்கப்பட்டுள்ளது.

மேலும், தியான மண்டபம் வாசலில் 55 அடி உயரம், 30 அடி அகலத்தில் கிறிஸ்துமஸ் டவர் அமைக்கப்பட்டுள்ளது. பேராலயம் முழுவதும் மின்விளக்குகளால் அலங்கரிக்கப்பட்டு, மின்னொளியில் ஜொலிக்கிறது. தூத்துக்குடியில், வெளிநாட்டுக்கு நிகராக கிறிஸ்துமஸை வரவேற்கும் வகையில் அலங்கார வாகன அணிவகுப்பு நடைபெற்றது. சாலையின் இரு பக்கங்களிலும் பொதுமக்கள் திரண்டு, அலங்கார வாகன அணிவகுப்பை கண்டு ரசித்தனர். பாய்மரக்கப்பல், பீரங்கி கப்பல், நண்டு, ஆக்டோபஸ், ஹெலிகாப்டர், ரோபோ போன்ற அலங்கார வாகனங்கள், மின்னொளியில் இளைஞர்களின் ஆட்டம் பாட்டம் என கிறிஸ்துமஸ் கேரல் களைகட்டியது.

கன்னியாகுமரி மாவட்டம் நீரோடி கடற்கரை கிராமத்தில் கிறிஸ்துமஸ் கொண்டாட்டம் களைகட்டியது. கிராம மக்கள், டிஜே பாடல் மற்றும் ஆடலுடன் கிறிஸ்து பிறப்பை மகிழ்ச்சியுடன் கொண்டாடினர். மதுரை கீழவாசல் பகுதியில் உள்ள நூற்றாண்டு பழமைவாய்ந்த புனிதமரியன்னை ஆலயத்தில் கிறிஸ்துமஸ்விழா கொண்டாடப்பட்டது. இதில், மதவேறுபாடின்றி ஏராளமான பொதுமக்கள்கலந்துகொண்டனர். சமத்துவத்தைஎடுத்துரைக்கும் வகையில் சிறார்கள் முருகன், மீனாட்சியம்மன், இஸ்லாமியர், கிறிஸ்துமஸ் தாத்தா வேடங்களில் தேவாலயத்திற்கு வருகை தந்தனர். கிறிஸ்துமஸ் பண்டிகையை ஒட்டி தமிழகம் முழுவதும் தேவாலாயங்களில் நடைபெற்ற சிறப்பு பிரார்த்தனையில் லட்சக்கணக்கானோர் கலந்துகொண்டனர். மத வேறுபாட்டை கடந்து, கிறிஸ்துமஸ் கொண்டாட்டங்களில் பலரும் குடும்பத்தினருடன் பங்கேற்று உற்சாகமடைந்தனர். ஆலய வளாகத்தின் முன்பு முளைப்பாரியை வைத்து, கிறிஸ்தவ பாடல்களை பாடியபடி கும்மியடித்தனர்.