கிணத்துக்கடவு :திமுக இளைஞரணி செயலாளர் உதயநிதி ஸ்டாலின் பிறந்தநாளையொட்டி கோவை தெற்கு மாவட்ட திமுக தொண்டரணி மற்றும் குளத்துப்பாளையம் திமுக ரேக்ளா குழுவினர் இணைந்து  நெகமம் அடுத்த குளத்துப்பாளையம்,குளத்துப்பாளையம்புதூர் சாலையில் ரேக்ளா பந்தயத்தை நடத்தினர்.  இதில் கிணத்துக்கடவு, பொள்ளாச்சி,வடசித்தூர்,உடுமலை,மெட்டுபாவி,செட்டியக்காப்பாளையம், நெகமம், சூலூர்,தொண்டாமுத்தூர், செஞ்சேரி, உடுமலை, திருப்பூர், தாராபுரம், கேரள மாநிலம் உள்ளிட்ட பல்வேறு பகுதிகளில் இருந்து இரு நூற்றுக்கும் மேற்பட்ட ரேக்ளா வண்டிகள் கலந்து கொண்டன.

பந்தயத்தில் களம் இறங்கிய காளைகள் சீறிப் பாய்ந்து சென்று இலக்கை நோக்கி ஓடியது. வண்டிகளில் பூட்டிய  காளைகள் சீறி பாய்ந்து சென்றதை சாலையோரம் நின்றிருந்த பொதுமக்கள் பார்த்து ரசித்தனர். பந்தயத்தில்100மீட்டர்,200 மீட்டர் மற்றும் 300 மீட்டர் உள்ளிட்ட தூரங்களை நிர்ணயித்து போட்டிகள் நடைபெற்றது. போட்டிகளில் வெற்றி பெற்ற காளைகளின் உரிமையாளர்களுக்கு ரொக்கப் பரிசுகள் வழங்கப்பட்டன.ரேக்ளா பந்தயத்தை காண சுற்று வட்டார கிராமங்களில் இருந்து ஏராளமான பொதுமக்கள் கூடியிருந்து கண்டு களித்தனர்.