ரஷ்யாவில் இருந்து ஸ்புட்னிக்- வி தடுப்பூசி இறக்குமதி பணிகள் தொடக்கம்!: ஜூன் மாதத்திற்குள் இந்தியா வர வாய்ப்பு..!!

டெல்லி: ஸ்புட்னிக்- வி தடுப்பூசி இந்த மாத இறுதியில் இருந்து ஜூன் மாதத்திற்குள் இந்தியாவிற்கு இறக்குமதி செய்யப்பட வாய்ப்பிருப்பதாக டாக்டர் ரெட்டி நிறுவனம் தெரிவித்துள்ளது. இந்தியாவில் வேகமெடுக்கும் கொரோனா தொற்றால் ஒருநாள் பாதிப்பு 2 லட்சத்தை தாண்டி உள்ளது. அதேநேரத்தில் கொரோனாவை தடுக்க தடுப்பூசிகள் போடும் நடவடிக்கையும் தீவிரப்படுத்தப்பட்டு வருகிறது. இந்தியாவில் இன்று காலை நிலவரப்படி 11,44,93,238 பேருக்கு கொரோனா தடுப்பூசி போடப்பட்டிருக்கிறது. இந்நிலையில் ஸ்புட்னிக்- வி தடுப்பூசி இறக்குமதி பணிகள் தொடங்கப்பட்டிருக்கின்றன. ரஷ்யாவின் ஸ்புட்னிக்- வி எனப்படும் கொரோனா தடுப்பூசிக்கு அவசரகால பயன்பாட்டிற்கு அனுமதி வழங்க இந்திய மருத்துவ தர கட்டுப்பாட்டு அமைப்பு ஒப்புதல் வழங்கியுள்ளது.

இந்த தடுப்பூசியை இந்தியாவில் தயாரிக்க ஹைதராபாத்தை சேர்ந்த டாக்டர் ரெட்டி நிறுவனம் அனுமதி பெற்றுள்ளது. முதற்கட்டமாக ரஷ்யாவில் இருந்து ஸ்புட்னிக்- வி தடுப்பூசியை இறக்குமதி செய்ய திட்டமிடப்பட்டுள்ளதாக தெரிவித்துள்ள டாக்டர் ரெட்டி நிறுவனம், அடுத்த காலாண்டில் இருந்து இந்த தடுப்பூசி இந்தியாவிலேயே உற்பத்தி செய்யப்படும் எனவும் தெரிவித்துள்ளது. முதலில் 25 கோடி தடுப்பூசிகள் இறக்குமதி செய்யப்பட உள்ளதாகவும் இந்த மாத இறுதியில் இருந்து ஜூன் மாதத்திற்குள் தடுப்பூசிகள் இந்தியா கொண்டுவரப்பட வாய்ப்புள்ளதாகவும் டாக்டர் ரெட்டி நிறுவனம் தெரிவித்துள்ளது.

ஸ்புட்னிக் தடுப்பூசி 2 டோஸ்களை கொண்டுள்ள நிலையில், ஒரு டோஸின் விலையை 225 ரூபாயாக நிர்ணயிக்க பேச்சுவார்த்தை நடைபெற்று வருவதாகவும் மத்திய அரசு வாங்கும் தடுப்பூசிகளின் எண்ணிக்கையை பொறுத்து விலை மாறுபட வாய்ப்புள்ளதாகவும்  டாக்டர் ரெட்டி நிறுவனம் தெரிவித்துள்ளது. ஸ்புட்னிக் V தடுப்பூசியானது 91.6% கொரோனாவை தடுக்கும் வலிமை கொண்டது. இந்தியாவில் ஆண்டுக்கு 850 மில்லியன் டோஸ்கள் தயாரிக்கப்பட உள்ளன.

Related Stories:

>