காம்பேக்ட் ரக எஸ்யூவி கார் மார்க்கெட்டில் ரெனோ டஸ்டர் சிறந்த தேர்வுகளில் ஒன்றாக வலம் வருகிறது. பல புதிய மாடல்களின் வருகையால், மார்க்கெட்டை நிலைநிறுத்த, இந்த காரில் கூடுதல் அம்சங்கள் சேர்க்கப்பட்டுள்ளன. இன்போடெயின்மென்ட் சிஸ்டம் ஆன்ட்ராய்டு ஆட்டோ மற்றும் ஆப்பிள் கார் ப்ளே செயலிகளை சப்போர்ட் செய்யும் விதத்தில் இந்த கார் மேம்படுத்தப்பட்டு இருக்கிறது. இதன் RxE, RxS மற்றும் RxZ ஆகிய வேரியண்ட்டுகளில் 7 அங்குல தொடுதிரை இன்போடெயின்மென்ட் சிஸ்டம் கிடைக்கும். எனினும், ஜிபிஎஸ் நேவிகேஷன் வசதி நீக்கப்பட்டு இருக்கிறது. ஸ்மார்ட்போனிலேயே இந்த வசதி இருப்பதால் நீக்கப்பட்டு இருப்பதாக தெரியவருகிறது. அதேபோன்று, அனைத்து வேரியண்ட்டுகளிலும் இபிடி-யுடன் கூடிய ஏபிஎஸ் பிரேக்கிங் சிஸ்டம் நிரந்தர பாதுகாப்பு அம்சமாக இடம்பெற்றுள்ளது. இது நிச்சயம் மதிப்பு கூட்டும் விஷயமாக இருப்பதுடன், புதிய பாதுகாப்பு நடைமுறைக்கு ஒப்பானதாக இருக்கும். ஏற்கனவே வழங்கப்பட்டு வந்த RxL பெட்ரோல் சிவிடி கியர்பாக்ஸ் வேரியண்ட்டிற்கு பதிலாக புதிய ரெனோ டஸ்ட்டர் காரில் RxS என்ற புதிய மேனுவல் கியர்பாக்ஸ் வேரியண்ட் அறிமுகம் செய்யப்பட்டு இருக்கிறது. அதேபோன்று, 84 பிஎச்பி பவரை அளிக்கவல்ல டீசல் இன்ஜின் மாடலில் இருந்து பேஸ் வேரியண்ட்டுகள் நீக்கப்பட்டுள்ளன.