ஐதராபாத்: வீட்டின் மீது கல்வீசி தாக்குதல் நடத்திய சம்பவம் காரணமாக, தனது மனைவி, குழந்தைகளை ஆந்திராவுக்கு அனுப்பி வைத்துள்ளார் அல்லு அர்ஜுன். ‘புஷ்பா 2’ படம் ஓடும் தியேட்டரில் கூட்ட நெரிசலில் சிக்கி பெண் இறந்ததற்கு அல்லு அர்ஜுன்தான் காரணம் என தெலுங்கானா முதல்வர் ரேவந்த் ரெட்டி குற்றம்சாட்டியிருந்தார். இதைத்தொடர்ந்து பத்திரிகையாளர்களை சந்தித்த அல்லு அர்ஜுன், தனது 20 வருட சினிமா வாழ்க்கையில் இது தன் மீது சுமத்தப்பட்ட களங்கம் என பேட்டி கொடுத்தார். பிறகு நேற்றுமுன்தினம் உஸ்மானியா பல்கலை மாணவர்கள் சிலர், ஐதராபாத் ஜூப்லிஹில்ஸ் பகுதியில் உள்ள அல்லு அர்ஜுன் வீட்டின் அருகே வந்து, அவர் வீடு மீது கல்வீசி தாக்குதல் நடத்தினர். அங்கிருந்த பூந்தொட்டிகளை உடைத்தனர். இதனால் அப்பகுதியில் பதற்றம் நிலவியது. இது தொடர்பாக 8 மாணவர்களை போலீசார் கைது செய்தனர். இதில் சில மாணவர்கள், ரேவந்த்ரெட்டியுடன் முன்பு எடுத்துக்கொண்ட புகைப்படங்கள் மீடியாவில் வெளியாகி பரபரப்பை ஏற்படுத்தியது. இதற்கிடையே தனது மனைவி மற்றும் மகன், மகளை ஆந்திராவில் உள்ள தனது மற்றொரு வீட்டுக்கு அல்லு அர்ஜுன் அனுப்பி வைத்திருக்கிறார். பாதுகாப்பு காரணங்களுக்காக அவர்களை அனுப்பியிருப்பதாக சொல்லப்படுகிறது.