சென்னை: முதல்வர் மு.க.ஸ்டாலின் தலைமையிலான அரசு பொறுப்பேற்று நான்காண்டு நிறைவடைந்து, 5ம் ஆண்டு தொடங்குவதையொட்டி, அண்ணா நூற்றாண்டு நூலக வளாகத்தில் நடந்த விழாவில், பல துறைகளின் சார்பில் 390 பேருக்கு நலத்திட்ட உதவிகளை முதல்வர் வழங்கினார். தமிழ்நாடு அரசின் சாதனைகளை விளக்கும் வகையில் செய்தி மக்கள் தொடர்பு துறையின் சார்பில் தயாரிக்கப்பட்டுள்ள நான்காண்டு சாதனைகள் பற்றிய குறும்படத்தையும் முதல்வர் பார்வையிட்டார். விழாவில் ‘இன்னுயிர் காப்போம் நம்மைக் காக்கும் 48’ திட்டத்தின் கீழ் பயன்பெற்ற பயனாளி, ‘தோழி விடுதி’ திட்டத்தின் கீழ் பயன்பெற்ற பயனாளிகள் தங்களுக்கு அரசால் கிடைத்த உதவிகள் குறித்து பேசியதுடன், முதல்வருக்கு நன்றி தெரிவித்துக் கொண்டனர். நிகழ்ச்சியில், இளைஞர் நலன் மற்றும் விளையாட்டு மேம்பாட்டு துறை சார்பில், 4 விளையாட்டு வீரர்களுக்கு மொத்தம் ரூ.31 லட்சத்திற்கான உயரிய ஊக்கத்தொகையும், தமிழ்நாடு சாம்பியன்ஸ் அறக்கட்டளை சார்பில், 4 பேருக்கு ரூ.6 லட்சத்து 4 ஆயிரம் மதிப்பிலான நிதி உதவி வழங்கப்பட்டது.

வேளாண்மை மற்றும் உழவர் நலத்துறை சார்பில், உழவர்களின் மேம்பாட்டிற்காக 4 பேருக்கு பவல் டில்லர், நாற்று நடவு செய்யும் இயந்திரம், விசை களையெடுப்பான், டிராக்டர் ஆகியவை 15 லட்சத்து 8 ஆயிரத்து 79 ரூபாய் மதிப்பீட்டில் 59 ஆயிரம் ரூபாய் அரசு மானியத்துடனும், 2023-24ம் ஆண்டிற்கான மாநில அளவில் சிறப்பாக சாகுபடி செய்த 11 விவசாயிகளுக்கு உதவிகளும் வழங்கப்பட்டது. 15 பேருக்கு பட்டா, 52 பேருக்கு சுய உதவிக் குழு கடன் உதவி, அண்ணல் அம்பேத்கர் தொழில் முனைவோர் திட்டம் மற்றும் கலைஞர் கைவினை திட்டத்தின் கீழ் 59 பேருக்கு நலத்திட்ட உதவிகள், 20 பேருக்கு வீட்டுவசதி கடன், 4 பேருக்கு திருமண உதவித் தொகை, ஓய்வு பெற்ற 8 பேருக்கு நிதியுதவிகள், இயற்கை மரணம் அடைந்த 14 பேருக்கு நிதி உதவிகளும், விபத்தில் உயிரிழந்த 3 பேருக்கு நிதி உதவி என 390 பேருக்கு நலத்திட்ட உதவிகளை முதல்வர் மு.க.ஸ்டாலின் வழங்கினார். நிகழ்ச்சியில் துணை முதல்வர் உதயநிதி ஸ்டாலின், அமைச்சர்கள் எம்.ஆர்.கே.பன்னீர்செல்வம், தங்கம் தென்னரசு, மா.சுப்பிரமணியன், எஸ்.எஸ்.சிவசங்கர், பி.கே.சேகர்பாபு, அன்பில் மகேஷ் பொய்யாமொழி, டி.ஆர்.பி. ராஜா, எம்பி, எம்எல்ஏக்கள் உள்ளிட்ட பலர் கலந்து கொண்டனர்.

 

The post தி.மு.க அரசு பொறுப்பேற்று 4 ஆண்டுகள் நிறைவு பல்வேறு துறைகளின் சார்பில் 390 பேருக்கு நலத்திட்ட உதவி: முதல்வர் மு.க.ஸ்டாலின் வழங்கினார் appeared first on Dinakaran.