சென்னை: தமிழ்நாடு அரசுப் போக்குவரத்துக் கழகங்களில் 3,274 ஓட்டுநர் மற்றும் நடத்துநர் பணியிடங்கள் நிரப்பப்பட உள்ளது. அதன்படி, சென்னை உள்ளிட்ட 8 போக்குவரத்து மண்டலங்களுக்கு உட்பட்ட 25 பகுதிகளில் காலியாக உள்ள பணியிடங்கள் நிரப்பப்படும். அதிகபட்சமாக, கும்பகோணம் போக்குவரத்து கழகத்தில் கும்பகோணம் 101, நாகப்பட்டினம் 136, திருச்சி 176, காரைக்குடி 185, புதுக்கோட்டை 110, கரூர் 48 என மொத்தம் 756 ஓட்டுநர் மற்றும் நடத்துநர் பணியிடங்களும், சேலம் போக்குவரத்து கழகத்தில் சேலம் 382, தர்மபுரி 104 என மொத்தம் 486 ஓட்டுநர் மற்றும் நடத்துநர் பணியிடங்களும் நிரப்பப்பட உள்ளன.

இதேபோன்று, விழுப்புரம் போக்குவரத்து கழகத்தில் விழுப்புரம் 88, வேலூர் 50, காஞ்சிபுரம் 106, கடலூர் 41, திருவண்ணாமலை 37 என மொத்தம் 322 பேரும், அரசு விரைவுப் போக்குவரத்துக் கழகத்தில் 318 பேரும் தேர்வு செய்யப்பட உள்ளனர். கல்வி தகுதியை பொறுத்தவரை பத்தாம் வகுப்பு தேர்ச்சி பெற்றிருக்க வேண்டும். தமிழ் எழுத, பேச, படிக்க தெரிந்திருக்க வேண்டும். 2025ம் ஆண்டு ஜூலை 1ம் தேதிப்படி 24 வயது பூர்த்தியாகி இருக்க வேண்டும்.

செல்லத்தக்க கனரக வாகன ஓட்டுநர் உரிமம் மற்றும் குறைந்தபட்சம் 18 மாதங்கள் கனரக வாகனம் ஓட்டிய அனுபவம், முதலுதவிச் சான்று, பொதுப் பணி வில்லை மற்றும் செல்லத்தக்க நடத்துநர் உரிமம் 2025 ஜன.1ம் தேதிக்கு முன்னர் பெற்றதாக இருத்தல் வேண்டும். இப்பணியிடங்களுக்கு இன்று பிற்பகல் 1 மணி முதல் ஏப்ரல் 21ம் தேதி வரை அரசுப் போக்குவரத்துக் கழகத்தின் www.arasubus.tn.gov.in என்ற அதிகாரப்பூர்வ இணையதளம் வாயிலாக விண்ணப்பிக்கலாம் என அறிவுறுத்தப்பட்டுள்ளது.

The post அரசு போக்குவரத்து கழகங்களில் இன்று முதல் 3,274 ஓட்டுநர், நடத்துநர் காலி பணியிடங்களுக்கு விண்ணப்பிக்கலாம் appeared first on Dinakaran.