சென்னை: சேலையூர் அருகே கழுத்து அறுத்து வாலிபர் கொடூரமான முறையில் கை, கால்கள் கட்டப்பட்ட நிலையில் மாற்றுத்திறனாளி பாலிபர் கொலை செய்யப்பட்டார். காதல் விவகாரத்தில் இந்த சம்பவம் நடந்ததா என போலீசார் தீவிரமாக விசாரித்து வருகின்றனர். இதனால் பெரும் பரபரப்பு ஏற்பட்டுள்ளது.

தாம்பரம் அருகே சேலையூர் அடுத்த மப்பேடு, புதூர் பகுதியில் சாலையோர காலி இடத்தில் ஒரு வாலிபர் கொலை செய்யப்பட்டு கிடப்பதாக சேலையூர் போலீசாருக்கு இன்று காலை தகவல் கிடைத்தது. உடனே போலீசார் சம்பவ இடத்திற்கு விரைந்து சென்று பார்த்தனர். அங்கு, வாலிபர் ஒருவர், கழுத்து அறுக்கப்பட்டு ரத்த வெள்ளத்தில் கொலை செய்யப்பட்டு கிடந்தார்.

உடல், ஒரு துணியால் சுற்றப்பட்டிருந்தது. பிரித்து பார்த்தபோது, அவர் மாற்றுத்திறனாளி வாலிபர் என்பதும் கழுத்து அறுக்கப்பட்டு, வெட்டுக்காயத்துடன் கை, கால்கள் துணியால் கட்டப்பட்ட நிலையில் உடல் கிடந்ததும் தெரிவந்தது. உடலை மீட்டு பிரேத பரிசோதனைக்காக குரோம்பேட்டை அரசு மருத்துவமனைக்கு போலீசார் அனுப்பி வைத்தனர்.

போலீசார் நடத்திய விசாரணையில், கொலை செய்யப்பட்டு கிடந்தவர் சேலையூர் அடுத்த மப்பேடு பகுதியை சேர்ந்த சூர்யா (23) என தெரிந்தது. இவரது தந்தை இறந்து விட்டார். தாய் மற்றும் சகோதரனுடன் வசித்து வந்தார். நேற்றிரவு குடிபோதையில் சூர்யா, வீட்டுக்கு சென்றுள்ளார்.

சிறிது நேரம் இருந்து விட்டு வெளியே சென்று வருவதாக தாயிடம் கூறி சென்றார். அதற்கு பிறகுதான் புதூர் பகுதியில் கொலை செய்யப்பட்டு கிடந்தார். அவரை கொலை செய்து வாகனத்தில் கொண்டு வந்து வீசி விட்டு மர்ம நபர்கள் தப்பி சென்றார்களா என்ற சந்தேகம் போலீசாருக்கு எழுந்துள்ளது.

அதே நேரத்தில், சிட்லபாக்கத்தை சேர்ந்த ஒரு சிறுமியை காதலித்து வந்ததாவும் கடந்த 3 மாதங்களுக்கு முன்பு காவல் நிலையத்தில் தஞ்சமடைந்ததாகவும், அவருக்கு 18 வயது ஆகாததால் அவரை, பெற்றோருடன் போலீசார் அனுப்பி வைத்ததாகவும் தெரியவந்துள்ளது. அதனால் காதல் விவகாரம் காரணமாக இந்த சம்பவம் நடந்ததா என்ற கோணத்திலும் போலீசார் விசாரணை நடத்தி வருகின்றனர்.

இதற்கிடையில் தகவலறிந்து பள்ளிக்கரணை காவல் துணை ஆணையர் கார்த்திகேயன் சம்பவ இடத்தை நேரில் ஆய்வு செய்து தீவிர விசாரணை நடத்தினார். சம்பவம் தொடர்பாக போலீசார் வழக்கு பதிவு செய்து அப்பகுதியில் உள்ள கண்காணிப்பு கேமராக்களை ஆய்வு செய்து கொலையாளிகளை தீவிரமாக தேடி வருகின்றனர். இச்சம்பவத்தால் அப்பகுதியில் பெரும் பரபரப்பு ஏற்பட்டுள்ளது.

The post தாம்பரம் சேலையூர் அருகே மாற்றுத்திறனாளி இளைஞர் கொடூர கொலை: போலீஸ் விசாரணை appeared first on Dinakaran.