இந்தோனேசியா: இந்தோனேசியாவில் உள்ள மசூதியில் ஏற்பட்ட தீ விபத்தில் ராட்சத குவிமாடம் இடிந்து விழுந்ததால் பெரும் பரபரப்பு ஏற்பட்டது.

இந்தோனேசியாவின் வடக்கு ஜகார்த்தாவில் ஜாமி மசூதி உள்ளது. இதன் ராட்சத குவிமாடம் புனரமைப்பு பணி நடந்து வருகிறது. நேற்றும் வழக்கம்போல புனரமைப்பு பணி நடந்தபோது, திடீரென தீப்பிடித்தது. சிறிது நேரத்தில் இடிந்து விழுந்தது. இதனால் அப்பகுதி அடர்ந்த புகை மூட்டமாக காணப்பட்டது.

அங்கிருந்தவர்கள் அலறி துடித்தனர். அப்பகுதியில் இருந்தவர்கள் கூச்சலிட்டனர். தகவலறிந்து போலீசார் மற்றும் தீயணைப்பு படை வீரர்கள் விரைந்தனர்.

தண்ணீரை பீய்ச்சியடித்து தீயை அணைத்தனர். இந்த சம்பவத்தில் யாருக்கும் காயம் ஏற்படவில்லை என போலீசார் உறுதி செய்தனர். சம்பவத்திற்கான காரணம் குறித்து விசாரணை நடத்தப்பட்டு வருவதாகவும், மசூதியை புனரமைக்கும் பணியில் ஈடுபட்டுள்ள ஒப்பந்த நிறுவனத்தை சேர்ந்த 4 தொழிலாளர்கள் விசாரணைக்கு உட்படுத்தப்பட்டுள்ளதாகவும் போலீசார் தெரிவித்தனர். இதனால் அப்பகுதியில் பெரும் பரபரப்பு ஏற்பட்டுள்ளது.