புதுடெல்லி: கொரோனா வைரஸ் பாதிப்பால் கல்வி நிறுவனங்கள் மூடப்பட்டுள்ள நிலையில், மாணவர்களுக்கு டிஜிட்டல் முறையில் பாடம் கற்பிக்க மத்திய அரசு ஏற்பாடு செய்துள்ளது. கொரோனா வைரசில் இருந்து மாணவர்களை காப்பதற்காக, முன்னெச்சரிக்கை நடவடிக்கையாக பள்ளி, கல்லாரிகளை வரும் 31ம் தேதி வரை மூடி மத்திய அரசு உத்தரவிட்டுள்ளது. இந்நிலையில், இந்த நாட்களில் மாணவர்களின் கல்வி பாதிக்காத வகையில், அவர்கள் வீட்டில் இருந்து கொண்டே படிப்பதற்காக டிஜிட்டல் முறையில் கல்வி கற்பிக்கும் வசதியை மத்திய மனிதவள அமைச்சகம் ஏற்பாடு செய்துள்ளது. இது தொடர்பாக அந்த அமைச்சக செயலாளர் அமித்கரே அனைத்து மாநிலங்கள், யூனியன் பிரதேசங்களின் தலைமை செயலாளருக்கு கடிதம் எழுதியுள்ளார். அதில் அவர், ‘கொரோனா தாக்குதலால் கல்வி நிறுவனங்கள் மூடப்பட்டுள்ள நிலையில் பள்ளி மற்றும் கல்லூரி மாணவர்களின் கல்வி பாதிப்படையாமல் இருக்கவும், டிஜிட்டல் முறையில் கல்வி கற்பிப்பதை ஊக்கப்படுத்தும் வகையிலும் மனிதவள அமைச்சகம் தீக்ஷா, இ பாத்சாலா, என்ஆர்ஓஇஆர், ஸ்வயம் மற்றும் ஸ்வயம் பிரபா போன்ற ஆன்லைன் கல்வி முறையை அறிமுகம் செய்துள்ளது.