டாலஸ்: ஏ. ஆர். ரஹ்மான் அமெரிக்காவில் இசை நிகழ்ச்சிக்காக சென்றிருக்கிறார். அங்கு சமீபத்தில் ‘ஓப்பன் ஏஐ’-யின் சி.இ.ஒ சாம் ஆல்ட்மேனை சந்தித்தார். அது குறித்து தனது சமூக வலைதளப் பக்கத்தில், ‘‘சாம் ஆல்ட்மேனை அவரது அலுவலகத்தில் சந்தித்தது மகிழ்ச்சியாக இருந்தது. நாங்கள் எங்கள் உலகளாவிய மெய்நிகர் இசைக் குழுவான ‘Secret Mountain’ பற்றியும், சவால்களை எதிர்கொள்ள ஏஐ கருவிகளைப் பயன்படுத்தி முன்னேற வழிவகுப்பது பற்றியும் விவாதித்தோம்’’ எனப் பதிவிட்டிருந்தார்.

இந்நிலையில் பிரபல பின்னணிப் பாடகர் யேசுதாஸை அமெரிக்காவில் உள்ள டாலஸில் சந்தித்திருக்கிறார். யேசுதாஸ், கடந்த சில ஆண்டுகளாக அங்குதான் வசிக்கிறார். யேசுதாஸை சந்தித்தது குறித்து ஏ.ஆர். ரஹ்மான், ‘‘என் குழந்தைப் பருவத்தின் ஃபேவரைட்டான யேசுதாஸ் அவர்களை டல்லாஸில் அவரின் இடத்தில் சந்தித்தேன். அவரது ஆராய்ச்சிப் பணியும், இந்திய பாரம்பரிய (கர்நாடக) இசை மீதான அன்பும் ஆச்சரியமளித்தது’’ எனக் குறிப்பிட்டுப் பதிவிட்டிருக்கிறார்.