இந்தியில் ஆமிர் கான் நடித்து வெற்றிபெற்ற ‘சித்தாரே ஜமீன் பர்’ என்ற படம், வரும் ஆகஸ்ட் 1ம் தேதி யூடியூப்பில் வெளியிடப்படுகிறது. இப்படத்தை இத்தளத்தில் மட்டுமே பார்க்க முடியும். ஆமிர் கான், ஜெனிலியா தேஷ்முக்குடன் 10 மாற்றுத்திறனாளிகள் நடித்துள்ள குடும்பக்கதை கொண்ட இப்படத்தை இந்தியாவில் 100 ரூபாய் கட்டணத்தில் பார்க்கலாம். தவிர அமெரிக்கா, கனடா, இங்கிலாந்து, ஆஸ்திரேலியா, ஜெர்மனி, இந்தோனேசியா, பிலிப்பைன்ஸ், சிங்கப்பூர், ஸ்பெயின் உள்பட 38 சர்வதேச நாடுகளில், அவரவர் நாட்டுக்கான கட்டணத்தில் பார்க்கலாம்.

2007ல் வெளியான ‘தாரே ஜமீன் பர்’ என்ற படத்தின் சீக்குவலாக உருவாக்கப்பட்ட ‘சித்தாரே ஜமீன் பர்’ என்ற படம், அசத்தலான ஸ்போர்ட்ஸ் டிராமாவாக அனைவராலும் கொண்டாடப்பட்டது. உலக அளவில் 250 கோடி ரூபாய் வசூலித்து சாதனை படைத்தது. தமிழ் மற்றும் முக்கிய மொழிகளில் சப்-டைட்டில், டப்பிங் வசதி வழங்கப்படுகிறது. இனி ஆமிர் கான் நடிக்கும் படங்கள் யூடியூப்பிலும் வெளியாகும். இதுகுறித்து நடிகரும், தயாரிப்பாளருமான ஆமிர் கான் கூறுகையில், ‘திரைப்படம் என்பது அனைவருக்கும் நியாயமான மற்றும் மலிவு விலையில் கிடைக்க வேண்டும் என்பதே என் விருப்பம்.

மக்கள் விரும்பிய இடத்தில் இருந்தபடியே எப்போது வேண்டுமானாலும் படத்தை பார்த்து ரசிக்கலாம். திரைத்துறையில் நுழையும் இளம் படைப்பாளிகளுக்கு இது ஒரு சிறந்த வாய்ப்பாக இருக்கும்’ என்றார். ‘சித்தாரே ஜமீன் பர்’ கதையை திவி நிதி சர்மா எழுத, கோலிவுட் டைரக்டர் ஆர்.எஸ்.பிரசன்னா இயக்கியுள்ளார்.