மும்பை: சமீபத்தில் ஜிம்மில் உடற்பயிற்சி மேற்கொண்டபோது நடிகை ராஷ்மிகாவின் காலில் காயம் ஏற்பட்டது. இதனால் படப்பிடிப்புகளில் கலந்துகொள்ளாமல் ஓய்வு எடுத்து வரும் ராஷ்மிகா, நேற்று நடைபெற்ற ‘சாவா’ படத்தின் டிரைலர் வெளியீட்டு விழாவில், கலந்துகொள்ள வேண்டும் என்பதற்காக காயத்தையும் பொருட்படுத்தாமல் பெங்களூரில் இருந்து விமானத்தில் பயணித்து மும்பை சென்றுள்ளார். நடிகை ராஷ்மிகா மந்தனாவை வீல் சேரில் விமான நிலையத்திற்குள் அழைத்து வந்தபோது எடுத்த வீடியோ சமூக வலைதளங்களில் வைரலாகி வருகிறது. அந்த வீடியோவில் நடிகை ராஷ்மிகா தனது இடது காலில் பிளாஸ்டருடன் காரில் இருந்து கவனமாக இறங்குகிறார்.

பின்னர் ஒரு காலில் குதித்து குதித்து வந்து வீல் சேரில் அமர்ந்துகொண்ட அவரை அதில் வைத்து விமான நிலையத்திற்குள் அழைத்து சென்றனர். அவரின் இந்த அர்ப்பணிப்பை பலரும் பாராட்டி வருகின்றனர். ஜிம்மில் உடற்பயிற்சி செய்தபோது எப்படி காயமடைந்தார் என்பதை ராஷ்மிகா ஏற்கனவே சமூக ஊடகங்களில் விளக்கியிருந்தார். தன் காலில் உள்ள காயத்தை புகைப்படமாக பதிவிட்டிருந்த அவர், வரும் வாரங்களில் குதிக்க முடியாது என நகைச்சுவையாக பதிவிட்டிருந்தார். அதேபோல் ‘தமா’, ‘சிகந்தர்’, ‘குபேரன்’ போன்ற படங்களின் படப்பிடிப்புகளுக்கு செல்ல முடியாததற்கும் வருத்தம் தெரிவித்திருந்தார்.