சென்னை: இருமொழி கொள்கை என்பது நமது உயிர் கொள்கை. இது பண பிரச்னை அல்ல; இன பிரச்னை. தமிழை காக்க – தமிழ்நாட்டின் உரிமைகளை நிலைநாட்ட விரைவில் முக்கிய அறிவிப்பு வெளியிட இருப்பதாக முதல்வர் மு.க.ஸ்டாலின் கூறியுள்ளார். சட்டப்பேரவையில் நேற்று முதல்வர் மு.க.ஸ்டாலின் இருமொழி கொள்கை தொடர்பான ஒரு சிறப்பு கவன ஈர்ப்பு தீர்மானம் கொண்டு வந்தார். இந்த தீர்மானத்துக்கு ஆதரவு தெரிவித்து, அமைச்சர் அன்பில் மகேஷ் பொய்யாமொழி, எழிலன் (திமுக), ஆர்.பி.உதயகுமார் (அதிமுக), செல்வப்பெருந்தகை (காங்கிரஸ்), ஜி.கே.மணி (பாமக), சின்னப்பா (மதிமுக),ஷாநவாஸ் (விசிக), நாகை மாலி (மார்க்சிய கம்யூ.), தளி ராமச்சந்திரன் (இந்திய கம்யூ.), அப்துல் சமது (மமக), ஈஸ்வரன் (கொமதேக), வேல்முருகன் (தவாக), ஆகியோர் ஆதரவு தெரிவித்து பேசினர். பாஜக உறுப்பினர்கள் யாரும் பேசவில்லை.

சிறப்பு கவன ஈர்ப்பு தீர்மானத்தின் மீதான விவாதத்தில் முதல்வர் மு.க.ஸ்டாலின் பதிலளித்து பேசியதாவது: தமிழும் ஆங்கிலமும்தான் தமிழ்நாட்டின் இருமொழி கொள்கை. அதில் எந்த மாற்றமும் இல்லை. இது மொழிக் கொள்கை மட்டுமல்ல; நமது வழிக் கொள்கையும் – விழிக் கொள்கையும் இதுதான். எந்த பழிச்சொல் சொன்னாலும், இந்த உயிர்க் கொள்கையில் விட்டுத் தர மாட்டோம்; விட்டு விலக மாட்டோம் என்பதை இம்மாமன்றத்தில் உறுதியாக மீண்டும் மீண்டும் நான் பதிவு செய்கிறேன்.

இந்தியை ஏற்காவிட்டால் பணம் தர மாட்டோம் என்று மிரட்டினாலும்; பணமே வேண்டாம் – தமிழ்மொழி காப்போம் என்ற அந்த உறுதியை நான் பல்லாயிரக்கணக்கான ஆசிரியர்கள் முன்னிலையில் விருத்தாசலத்தில் நடைபெற்ற பெற்றோர் ஆசிரியர் கழக மாநாட்டில் குறிப்பிட்டு காட்டியிருக்கிறேன். 2 ஆயிரம் கோடி என்ன? 10 ஆயிரம் கோடி கொடுத்தாலும் மும்மொழி திட்டத்தை ஏற்க மாட்டோம் என்று குறிப்பிட்டேன். மீண்டும் சொல்கிறேன், இது பணப்பிரச்னை அல்ல; நம் இனப்பிரச்னை.

நம் தமிழை, தமிழினத்தை, தமிழ்நாட்டு மாணவ கண்மணிகளை, இளைய சமுதாயத்தை காக்கும் பிரச்னை. அவர்கள் நிதி தரவில்லை என்பதற்காக இனமானத்தை அடமானம் வைத்து வெகுமானம் பெறும் கொத்தடிமை அல்ல நாங்கள். தடைக்கற்கள் உண்டு என்றால், அதை உடைத்து எரியும் தடந்தோள்கள் உண்டென்று என்று சொல்லும் திராவிட மாடல் ஆட்சி இது. இந்த ஆட்சியில், சமூகநீதியும் தமிழ்மொழி காப்பும் இருகண்கள். இதே மாமன்றத்தில் அண்ணா முதலமைச்சராக இருந்தபோது, 23.1.1968 அன்று இருமொழி கொள்கை தீர்மானம் கொண்டு வரப்பட்டது.

ஒன்றிய அரசின் இந்தி திணிப்பு திட்டத்தை இந்த மன்றம் ஏற்க மறுக்கிறது. மத்திய அரசின் திட்டத்தை ஏற்க மறுக்கும் வகையிலும், மாணவர் எண்ணத்துக்கு மதிப்பளிக்கும் வகையிலும் தமிழ்நாட்டில் உள்ள பள்ளிகள், கல்லூரிகள், பல்கலைக்கழகங்களில் தமிழ், ஆங்கிலம் ஆகிய இருமொழிக் கொள்கையே செயல்பாட்டில் இருக்கும். இது தமிழ்நாட்டுக்கு அண்ணா அளித்த மாபெரும் கொடை. இது கொள்கை மட்டுமல்ல; தமிழ்நாட்டை பொறுத்தவரையில் சட்டம். தாய் நிலத்துக்கு தமிழும் – உலகத் தொடர்புக்கு ஆங்கிலமும் என்று அண்ணா வடித்த சட்டம் அது.

தமிழிலும் ஆங்கிலத்திலும் கரைகண்ட அவர், வடித்துக் கொடுத்தசட்டம் அது. இந்த இருமொழிக் கொள்கைதான் அரைநூற்றாண்டு காலமாக நம் தமிழ்நாட்டை வளர்த்து வந்துள்ளது. உலகளாவிய பரப்பில் நமது தமிழ் மக்கள் வாழவும், ஆளுமை செலுத்தவும், உயர்த்தவும், உன்னதமான உயரத்தை அடையவும் வழிவகுத்த கொள்கை இந்த இருமொழி கொள்கைதான். எந்த மொழிக்கும் எதிரானவர்கள் அல்ல நாம்; இந்த இரு மொழிகளே போதும் என்று சொல்பவர்கள் நாம். யார் எந்த மொழியை கற்பதற்கும் தடையாக நிற்பதில்லை. அதே நேரத்தில், தாய்மொழியாம் தமிழை அழிக்க நினைக்கும் ஆதிக்க மொழி எதுவாக இருந்தாலும் அதை அனுமதிப்பதில்லை என்பதால்தான் இருமொழி கொள்கையை கடைப்பிடிக்கிறோம்.

மொழிக் கொள்கையில் தமிழ்நாடு வகுத்துள்ள பாதையும், அதன் உறுதியான நிலைப்பாடுமே சரி என்பதை நமது அண்டை மாநிலங்கள் தொடங்கி, இந்தியாவின் பல மாநிலங்களும் இப்போது உணர்ந்து வருவதை பார்க்கிறோம். இன்னொரு மொழியை திணிக்க அனுமதித்தால், அது நம் மொழியை மென்று தின்று விடும் என்பதை நாம் வரலாற்றுப் பூர்வமாக உணர்ந்தவர்கள் என்ற அடிப்படையில்தான் இருமொழி கொள்கையை சிக்கென பிடிக்கிறோம்.
இந்தி மொழி திணிப்பு என்பது, ஒரு மொழித் திணிப்பு மட்டுமல்ல; பண்பாட்டு அழிப்பாக அமையும் என்பதால்தான் இதில் உறுதியாக இருக்கிறோம்; இருப்போம். இந்த மொழி திணிப்பின் மூலமாக மாநிலங்களை, மாநில மொழிகளை, ஒரு இனத்தை ஆதிக்கம் செலுத்த நினைக்கிறார்கள். இதற்கு ஒட்டுமொத்தமாக முற்றுப்புள்ளி வைத்தாக வேண்டும்.

மாநிலங்களை தங்களது கொத்தடிமை பகுதிகளாக நினைப்பதால்தான் இதுபோன்ற மொழி திணிப்புகளும், நிதி அநீதிகளையும் செய்கிறார்கள். எனவே, இந்தியாவின் கூட்டாட்சி தன்மையை காக்கவும் – மாநிலங்களின் சுயாட்சியை வென்றெடுக்கவும் மிகச்சரியான முன்னெடுப்புகளை செய்ய வேண்டிய கட்டாயத்தில் நாம் இருக்கிறோம். மாநில சுயாட்சியை உறுதி செய்து, மாநில உரிமைகளை நிலைநாட்டினால்தான் தமிழ்மொழியையும் காக்க முடியும், தமிழினத்தையும் உயர்த்த முடியும் என்பதை உறுதிபட தெரிவித்து, அதற்கான அறிவிப்பை விரைவில் வெளியிடுவேன்.
இவ்வாறு முதல்வர் மு.க.ஸ்டாலின் பேசினார்.

* டெல்லி தலைவரிடம் வலியுறுத்துங்கள் எடப்பாடிக்கு முதல்வர் வேண்டுகோள்
இருமொழி கொள்கை குறித்து பாஜ தவிர்த்து அனைத்து கட்சிகளும் இங்கே தங்கள் உணர்வுகளை வெளிப்படுத்தி காட்டியிருக்கின்றார்கள். நம்முடைய எதிர்க்கட்சி துணைத்தலைவர், அதிகாரிகள் மூலமாக இந்த இருமொழி கொள்கை, மும்மொழி கொள்கை குறித்து ஒன்றிய அரசிடமிருந்து கடிதம் வந்ததாகவும், அந்த கடிதத்திற்கு விளக்கம் தந்ததாகவும் அதில் ஒரு தவறான கருத்தை நாடாளுமன்றத்தில் பதிவு செய்யக்கூடிய நிலையில் இருந்திருக்கிறது என்பதையும் சுட்டிக்காட்டியிருக்கிறார். தயவுசெய்து எந்த சந்தேகமும் படவேண்டாம். அதில் நாங்கள் உறுதியாக இருக்கின்றோம். எந்த காரணத்தை கொண்டும் இதை ஏற்றுக்கொள்ள மாட்டோம்.

இந்த நேரத்தில் என்னுடைய அன்பான வேண்டுகோள். ஏனென்றால், பிரதான எதிர்க்கட்சியாக இருக்கக்கூடிய அதிமுக-வை சார்ந்த எதிர்க்கட்சி துணைத்தலைவர் பேசும்போது நாங்கள் என்றைக்கும் இந்த விஷயத்தில் ஒற்றுமையாக இருப்போம் என்ற உறுதியை தந்திருக்கிறார். நம்முடைய எதிர்க்கட்சி தலைவர் (எடப்பாடி பழனிசாமி) டெல்லிக்கு சென்றிருப்பதாக செய்தி வந்திருக்கிறது. டெல்லிக்கு சென்றிருக்கும் நேரத்தில் யாரை சந்திக்க போகிறார் என்ற அந்த செய்தியும் வந்திருக்கிறது. அப்படி சந்திக்கும் நேரத்தில் இதுகுறித்து அவர் அங்கே வலியுறுத்த வேண்டும் என்ற வேண்டுகோளை இந்த அவையின் மூலமாக நான் எடுத்துவைக்க கடமைப்பட்டிருக்கிறேன் என்று முதல்வர் கூறினார்.

The post இருமொழி கொள்கை நமது உயிர் கொள்கை. இது பண பிரச்னை அல்ல; இன பிரச்னை தமிழை காக்க-தமிழ்நாட்டின் உரிமைகளை நிலைநாட்ட விரைவில் முக்கிய அறிவிப்பு: முதல்வர் மு.க.ஸ்டாலின் பேரவையில் சூளுரை appeared first on Dinakaran.