போபால்: மத்தியப்பிரதேசம் போபாலில் கடந்த 1984ம் ஆண்டு விஷவாயு கசிவு விபத்தில் சிக்கி மூடப்பட்ட யூனியன் கார்பைடு தொழிற்சாலையில் உள்ள கழிவுகளை 4வாரங்களுக்குள் அகற்ற வேண்டும் என்று அம்மாநில உயர்நீதிமன்றம் உத்தரவிட்டுள்ளது. இதையடுத்து 40 ஆண்டுகளாக செயல்படாமல் உள்ள தொழிற்சாலைக்குள் இருக்கும் சுமார் 377டன் அபாயகரமான கழிவுகள் அகற்றப்பட்டு எரிக்க திட்டமிடப்பட்டுள்ளது. இந்த கழிவுகள் அகற்றும் பணி திங்களன்று தொடங்கியது. அபாயகரமானதாக கருதப்படும் இந்த கழிவுகள் போபாலில் இருந்து சுமார் 250கி.மீ. தொலைவில் இந்தூர் அருகே உள்ள பிதாம்பூருக்கு கொண்டு சென்று எரிக்கப்பட இருந்தது.

இந்நிலையில் கழிவுகளை இடமாற்றம் செய்வதால் ஏற்படும் பாதுகாப்பு அச்சுறுத்தல் மற்றும் சுற்றுச்சூழல் தாக்கத்துக்கு கவலை தெரிவித்து போராட்டங்கள் வெடித்துள்ளது. பிதாம்பூர் பச்சோ சமிதி அமைப்பு சார்பில் முழுஅடைப்புக்கு அழைப்பு விடுக்கப்பட்டு இருந்தது. போராட்டத்தில் ஈடுபட்ட பொதுமக்களில் இரண்டு பேர் திடீரென தீக்குளிக்க முயன்றதால் பதற்றம் ஏற்பட்டது. அங்கிருந்தவர்கள் உடனடியாக தீயை அணைத்து அவர்களை மருத்துவமனையில் அனுமதித்தனர். பல இடங்களில் சாலை மறியல் போராட்டங்கள் நடத்தப்பட்டது. இதனிடையே சுமார் 500 பேர் கழிவுகள் எரிக்கப்பட உள்ள தனியார் நிறுவன வளாகத்திற்கு பேரணியாக சென்றனர். அவர்களை போலீசார் உடனடியாக கலைத்தனர்.

The post 40 ஆண்டுகளுக்கு பின் அகற்றப்பட்ட போபால் விஷ கழிவுகளை கொண்டு வர எதிர்ப்பு தெரிவித்து இருவர் தீக்குளிப்பு appeared first on Dinakaran.