கோவை: பாஜ எம்எல்ஏ பேட்டியின் போது விஜய் ரசிகர் செய்த சேட்டை சமூக வலைதளங்களில் வைரலாகி வருகிறது. கோவை காந்திபுரம் பகுதியில் சில நாட்களுக்கு முன் பஸ் ஸ்டாப் நிழற்குடை திறப்பு விழா நடந்தது. இதில், பாஜ தெற்கு தொகுதி எம்எல்ஏ வானதி சீனிவாசன் கலந்து கொண்டார். பின்னர், அவர் நிருபர்களிடம் பேசிக் கொண்டிருந்தார். வயநாடு தொகுதி தேர்தல் பிரசாரம், பாஜவின் நிலைப்பாடு குறித்து அவர் பேசிய போது, அவரின் பின்னால் தோளில் பேக் மாட்டிய வாலிபர் ஒருவர் நின்று கொண்டிருந்தார்.

அவர் தமிழக வெற்றிக் கழகத்தின் தலைவர் நடிகர் விஜய்யின் போட்டோவை செல்போன் வால்பேப்பரில் இருந்து காட்டினார். அதை வீடியோ, போட்டோகிராபர்கள் கவனிக்கும் வகையில் காட்டிய அவர், அடுத்த சில நொடிகளில் அங்கிருந்து எஸ்கேப் ஆனார். பாஜ எம்எல்ஏ பேசி கொண்டிருந்தபோது விஜய் போட்டோவை, ஊடகங்களின் கேமராவுக்கு காட்டிச் சென்ற வீடியோ தற்போது வைரலாகி வருகிறது.

முன்னதாக யாருக்கோ அந்த வாலிபர் போன் செய்து வானதி சீனிவாசன் பேட்டி நேரலை வருவதை உறுதி செய்த பின்பு, செல்போனில் விஜய்யின் புகைப்படத்தை எடுத்து கேமரா முன்பு காண்பித்து விட்டு சட்டென்று அங்கிருந்து நகர்ந்து விட்டார். யாரும் கவனிக்காத அந்த நிகழ்ச்சியின் போட்டோ, வீடியோ பதிவுகளை இப்போது யார் வெளியிட்டார்கள் என தெரியவில்லை. அந்த வாலிபர் யார் எனவும் தெரியவில்லை. ஒரு கட்சி எம்எல்ஏ பத்திரிகையாளர்களை சந்தித்து கொண்டிருந்தபோது விஜய் போட்டோவை ஒரு ரசிகர் காட்டிய செயல் சிறுபிள்ளைத்தனமாக இருப்பதாக நெட்டிசன்கள் விமர்சித்து வருகின்றனர்.

The post பாஜ எம்எல்ஏ பேட்டியின் போது விஜய் ரசிகர் செய்த சேட்டை: சமூக வலைதளங்களில் வைரலாகும் வீடியோ appeared first on Dinakaran.