புதிய தலைமை நீதிபதியாக நவ.11ல் பதவி ஏற்க உள்ள சஞ்சீவ் கண்ணா, நீதிபதிகள் ஜேபி பர்திவாலா, மனோஜ் மிஸ்ரா ஆகியோர் அடங்கிய அமர்வில் இருந்த தலைமை நீதிபதி சந்திரசூட், அந்த அமர்வில் இருந்து விடைபெற்றார். அவருக்கு அட்டர்னி ஜெனரல், சொலிசிட்டர் ஜெனரல், உச்ச நீதிமன்ற பார் அசோசியேஷன் தலைவர் கபில் சிபல் உள்பட பலர் வாழ்த்து தெரிவித்தனர். அவர்களது வாழ்த்துக்கு நன்றி தெரிவித்து சந்திரசூட் பேசுகையில்,’ என்னைத் தொடர்ந்து நடத்துவது எது என்று கேட்டீர்கள்.
இந்த நீதிமன்றம்தான் என்னைத் தொடர்ந்து நடத்த வைத்தது. தேவையில் இருப்பவர்களுக்கும், நீங்கள் சந்திக்காதவர்களுக்கும், உங்களுக்குத் தெரியாத நபர்களுக்கும், அவர்களைப் பார்க்காமலேயே உங்கள் வாழ்க்கையை பாதிக்கும் திறன் கொண்டவர்களுக்கும் சேவை செய்வதை விட மேலான உணர்வு எதுவும் இல்லை. இளம் சட்ட மாணவராக இந்த நீதிமன்றத்தின் கடைசி வரிசையில் அமர்ந்தது முதல் இப்போது தலைமை நீதிபதியாக பதவி வகித்தது வரை பல நினைவுகள் என் நெஞ்சில் நிழலாடுகின்றன.
நாட்டிற்குச் சேவையாற்றுவதற்கான மகத்தான பாக்கியம் எனக்கு கிடைத்தது. நீதிமன்றத்தில் செலவழிக்கும் ஒவ்வொரு நாளும் சட்ட அறிவு மற்றும் தனிப்பட்ட நுண்ணறிவு இரண்டையும் கற்றுக் கொள்ளவும் வளரவும் ஒரு வாய்ப்பாக அமைந்தது. நாங்கள் இங்கு நீதியை நிலைநாட்டுகிறோம். இருப்பினும் தற்செயலான தவறுகள் அல்லது தவறான புரிதல் அடிப்படையில் நான் யாரையும் புண்படுத்தியிருந்தால், நான் உங்களிடம் மன்னிப்பு கேட்கிறேன்’ என்று கூறினார்.
அதை தொடர்ந்து உச்ச நீதிமன்ற பார் அசோசியேஷன் நடத்திய பாராட்டு விழாவில் புதிய தலைமை நீதிபதியாக பதவி ஏற்க உள்ள சஞ்சீவ் கண்ணா பேசியதாவது: உச்ச நீதிமன்றத்தில் இருந்து சந்திரசூட் ஓய்வு என்பது ஒரு வெறுமை. நீதியின் காட்டில் உயர்ந்து நிற்கும் மரம் பின்வாங்கும்போது, பறவைகள் தங்கள் பாடல்களை இடைநிறுத்துகின்றன, காற்று வித்தியாசமாக நகர்கிறது. மற்ற மரங்கள் மாறி மாறி வெற்றிடத்தை நிரப்புகின்றன. ஆனால் காடு ஒருபோதும் மாறாது.
வரும் திங்கட்கிழமை முதல், இந்த மாற்றத்தை நாம் ஆழமாக உணர்வோம். இந்த நீதிமன்றத்தின் தூண்கள் வழியாக ஒரு வெறுமை எதிரொலிக்கும். தலைமை நீதிபதி ஒரு நேர்த்தியான சொற்பொழிவாளர் மட்டுமல்ல, எழுதப்பட்ட வார்த்தையிலும் அதே போல் சமமான தேர்ச்சி பெற்றவர். அவரின் மற்றொரு பாராட்டத்தக்க அம்சம் அவரது சுய ஒழுக்கம் மற்றும் அசைக்க முடியாத பணி நெறிமுறை. ஒரு தலைமை நீதிபதியாக, அவர் தனது தலைமையின் கீழ் இந்த நீதிமன்றத்தை மேம்படுத்துவதற்கான ஒரு பணி மேற்கொண்டிருந்தார். மேலும் ஆழ்ந்த கருணை கொண்டவர். உச்ச நீதிமன்றத்தை அனைவரும் அணுகக்கூடிய இடமாக மாற்றும் தனது இலக்கை இடைவிடாமல் தொடர்ந்தார். எங்களுக்குள் பல்வேறு விவாதங்கள் இருந்தன.
ஆனால் மோதல்கள் இல்லை. அனைத்தையும் சமாளிக்கும் வழிமுறைகளையும் நாங்கள் கண்டுபிடித்தோம். உச்ச நீதிமன்றத்தில் இவ்வளவு அர்ப்பணிப்புடன் பணியாற்றிய, வாழ்ந்த ஒருவர் செல்வதால், சந்தேகத்திற்கு இடமின்றி நிச்சயம் வெற்றிடம் ஏற்படும். நிச்சயமாக, தலைமை நீதிபதியின் இடத்தை உடல் ரீதியாக நாங்கள் தவறவிடுவோம். ஆனால் நீங்கள் எப்போதும் எங்களில் ஒருவராக எங்களிடையே இருப்பீர்கள். ஏனெனில் உண்மையில் நீங்கள், உங்கள் வழியில் சிறப்பாக செயல்பட்டீர்கள். இவ்வாறு புகழாரம் சூட்டினார்.
* அதிகமாக ட்ரோல் செய்யப்பட்ட நீதிபதி நான்தான்
தலைமை நீதிபதி சந்திரசூட் கூறுகையில்,’ பொது வாழ்வில் வெளிப்படைத்தன்மை முக்கியம் என்ற கோட்பாட்டின் மீது நம்பிக்கை கொண்டதால், அனைத்து விமர்சனங்களையும் ஏற்கும் அளவுக்கு எனது தோள்கள் அகலமாக உள்ளன. இருப்பினும் மிகவும் அதிகமாக ட்ரோல் செய்யப்பட்ட நீதிபதிகளில் ஒருவராக நான் இருக்கலாம். ட்ரோல் செய்பவர்கள் இனிேமல் திங்கள் முதல் வேலையற்றவர்களாக மாறுவார்கள்’ என்று கூறினார்.
* ஒரு அசாதாரண தந்தையின் ஒரு அசாதாரண மகன்
தலைமை நீதிபதி சந்திரசூட்டின் தந்தை ஒய்.வி. சந்திரசூட்டும் உச்சநீதிமன்ற தலைமை நீதிபதியாக பணியாற்றியவர். அவர் 1978 பிப்.22 முதல் 1985 ஜூலை 11 வரை 7 ஆண்டுகள் 139 நாள் என மிக நீண்ட காலம் தலைமை நீதிபதியாக பணியாற்றினார். இதை உச்ச நீதிமன்ற பார் அசோசியேஷன் தலைவர் கபில் சிபல் குறிப்பிட்டு பேசினார்.
அவர் கூறுகையில்,’ ஒரு அசாதாரண தந்தையின் அசாதாரண மகன் தற் ேபாதைய தலைமை நீதிபதி சந்திரசூட். கடந்த 52 ஆண்டுகளாக இந்த நீதிமன்றத்தில் நான் பயிற்சி செய்து வருகிறேன். என் வாழ்நாளில், உங்களிடம் இருக்கும் எல்லையற்ற பொறுமை கொண்ட நீதிபதியை நான் பார்த்ததில்லை. நீதிபதியாக உங்கள் நடத்தை முன்னுதாரணமாக இருந்தது.
அதற்கு யாராலும் ஈடுகட்ட முடியாது’ என்றார். முன்னாள் அட்டர்னி ஜெனரல் கே.கே.வேணுகோபால் கூறுகையில்,’ உங்கள் தந்தை தலைமை நீதிபதி சந்திரசூட், உங்களைப்பற்றி என்னிடம், அவன் வக்கீலாக தொடர வேண்டுமா அல்லது நீதிபதியாக பதவி ஏற்க வேண்டுமா என்று என்னிடம் கேட்டபோது, அவர் ஒரு சிறந்த வழக்கறிஞர், அவர் வக்கீலாக தொடரட்டும் என்று நான் கூறினேன். நீங்கள் என் பேச்சைக் கேட்டிருந்தால், இவ்வளவு பெரிய நீதிபதியை நாங்கள் இழந்திருப்போம்’ என்றார்.
The post நாட்டின் 50வது தலைமை நீதிபதி விடைபெற்றார் சந்திரசூட்: சஞ்சீவ் கண்ணா நவம்பர் 11ல் பதவி ஏற்பு appeared first on Dinakaran.