* கடந்த 2 ஆண்டுகளில் விமானங்களின் ஜிபிஎஸ் அமைப்பில் 1,951 குறுக்கீடுகள்
2023 நவம்பர் முதல் கடந்த இரண்டு ஆண்டுகளில் விமானங்களின் ஜிபிஎஸ் அமைப்பில் மொத்தம் 1,951 குறுக்கீட்டுப் பிரச்சினைகள் பதிவாகியுள்ளன என்று ஒன்றிய விமான போக்குவரத்து இணையமைச்சர் முரளிதர் மோஹோல் தெரிவித்தார். அவர் மேலும் கூறுகையில், ‘சமீப காலங்களில், டெல்லி, மும்பை, கொல்கத்தா, அமிர்தசரஸ், ஹைதராபாத், பெங்களூரு மற்றும் சென்னை விமான நிலையங்களில் ஜிபிஎஸ் திசைதிருப்பல் மற்றும் குறுக்கீட்டுச் சம்பவங்கள் நிகழ்ந்துள்ளன’ என்றார்.

* மாசுபட்ட டெல்லியில் இருந்து நாடாளுமன்றக் கூட்டத்தொடர்களை இடமாற்றம் செய்ய வேண்டும்
டெல்லியில் ஆண்டுதோறும் காற்றின் தரம் மேம்படும் வரை நாடாளுமன்றத்தின் குளிர்கால மற்றும் பட்ஜெட் கூட்டத்தொடர்களை டெல்லிக்கு வெளியே இடமாற்றம் செய்ய வேண்டும் என்று ஒடிசாவைச் சேர்ந்த பிஜூஜனதா தளம் எம்பி மங்கராஜ் தெரிவித்தார். அவர் கூறுகையில்,’ புயல்கள், வெள்ளம் மற்றும் இயற்கை பேரிடர்களை நிகரற்ற ஒழுக்கத்துடன் எதிர்கொள்ளும் ஒடிசா மாநிலத்தைச் சேர்ந்தவன் என்ற முறையில், ஒரு நெருக்கடி எப்படி இருக்கும் என்பது எனக்குத் தெரியும். ஆனால் என்னை வருத்துவது… டெல்லிதான்’ என்றார்.

* மகாராஷ்டிராவில் 3 மாதங்களில் 766 விவசாயிகள் தற்கொலை
மகாராஷ்டிராவில் கடந்த மூன்று மாதங்களில் 766 விவசாயிகள் தற்கொலை செய்துகொண்டுள்ளனர் என்று என்சிபி-சரத்பவார் கட்சிஎம்.பி. பவுசியா கான் மாநிலங்களவையில் தெரிவித்தார்.

* தேர்தல் ஆணையம் அரசின் கைப்பாவையாகிவிட்டது
தேர்தல் ஆணையம் அரசின் கைப்பாவையாகிவிட்டது ன்று காங்கிரஸ் மாநிலங்களவை உறுப்பினர் அஜய் மாக்கன் குற்றம் சாட்டினார். அவர் கூறுகையில்,’ சமமான போட்டிச் சூழல், வெளிப்படைத்தன்மை மற்றும் தேர்தல் செயல்முறையின் நம்பகத்தன்மை இல்லாத நிலையில் ஜனநாயகம் எப்படி நிலைத்திருக்கும். இந்தியா தன்னை ஜனநாயகத்தின் தாய் என்று பெருமையுடன் கூறிக்கொண்டாலும், ஒரு நியாயமான தேர்தலுக்கான மூன்று அடிப்படைக் கூறுகளான சமமான போட்டிச் சூழல், வெளிப்படைத்தன்மை மற்றும் நம்பகத்தன்மை ஆகியவை திட்டமிட்டுப் பலவீனப்படுத்தப்பட்டுள்ளன.எந்திரத்தால் படிக்கக்கூடிய வாக்காளர் பட்டியல்களை வழங்க மறுப்பது, ஐபி முகவரிகளை மறைப்பது மற்றும் 45 நாட்களுக்குள் ஆதாரங்களை அழிப்பது போன்ற செயல்களில் தேர்தல் ஆணையம் ஈடுபடுகிறது. இப்போது தேர்தல் ஆணையம் அரசின் கைப்பாவையாகிவிட்டது. நடுவர் ஒரு அணியின் சீருடையை அணிந்தால், மற்ற அணி என்ன செய்யும்? நடுவரே போட்டியை நிர்ணயம் செய்தால், வீரர்கள் என்ன செய்வார்கள்?.

கடந்த 20 ஆண்டுகளில், 2004 முதல், பாஜகவின் வங்கிக் கையிருப்பு ரூ. 87.96 கோடியிலிருந்து ரூ. 10,107.2 கோடியாக அதிகரித்துள்ளது, அதே நேரத்தில் காங்கிரஸின் கையிருப்பு ரூ.38.48 கோடியிலிருந்து ரூ.133.97 கோடியாக அதிகரித்துள்ளது. தேர்தலுக்குச் சற்று முன்னதாக காங்கிரஸிடம் இருந்து நிதியைத் தடுக்கும் நோக்கில், அதன் மீது அமலாக்கத்துறை மற்றும் வருமான வரித் துறையை ஏவிவிடப்படுகிறது. உங்களுக்குக் கொடுக்க முடியாது. ஏனென்றால், நாங்கள் கொடுத்த அடுத்த கணமே அமலாக்கத்துறை மற்றும் வருமான வரித்துறை எங்களைத் துரத்தும், எங்களால் எதுவும் செய்ய முடியாது என்று தொழில் அதிபர்கள் கூறுகிறார்கள். இந்தச் சூழ்நிலையில் ஜனநாயகம் எப்படி நிலைத்திருக்கும்? ஆளும் கட்சியிடம் எதிர்க்கட்சியை விட 75 மடங்கு அதிக பணம் இருக்கும்போது, ​​எப்படி ஒரு சமமான போட்டிச் சூழல் இருக்க முடியும். பாஜவுக்குச் சென்ற பணம் அனைத்தும் தேர்தல் பத்திரங்களால் தான் கிடைத்தது’ என்றார்.

* ஒரே நாடு, ஒரே தேர்தல் மசோதாக்களை ஆராயும் குழுவின் பதவிக்காலம் நீட்டிப்பு
மக்களவை மற்றும் மாநில சட்டமன்றங்களுக்கு ஒரே நேரத்தில் தேர்தல்களை அறிமுகப்படுத்தும் மசோதாக்களை ஆராயும் நாடாளுமன்றக் குழுவின் பதவிக்காலத்தை மக்களவை நேற்று நீட்டித்தது. அந்த குழுவின் தலைவர் பி. பி. சவுத்ரி, அரசியலமைப்பு (129வது திருத்த) மசோதா, 2024 மற்றும் யூனியன் பிரதேச சட்டங்கள் (திருத்த) மசோதா, 2024 ஆகியவற்றுக்கான கூட்டுக் குழுவின் பதவிக்காலத்தை 2026 பட்ஜெட் கூட்டத்தொடரின் கடைசி வாரத்தின் முதல் நாள் வரை நீட்டிக்கக் கோரும் தீர்மானத்தை முன்மொழிந்தார். மக்களவை அந்தத் தீர்மானத்தை குரல் வாக்கெடுப்பு மூலம் ஏற்றுக்கொண்டது. கடந்த டிசம்பரில் அமைக்கப்பட்ட இந்தக் குழு, அரசியலமைப்பு வல்லுநர்கள், பொருளாதார வல்லுநர்கள், சட்ட ஆணையத் தலைவர் தினேஷ் மகேஸ்வரி உள்ளிட்ட பலரைச் சந்தித்துள்ளது.

* கம்போடியா, மியான்மர், லாவோஸ் நாடுகளில் 6,700க்கும் மேற்பட்ட இந்தியர்கள் மீட்பு
போலி வேலைவாய்ப்பு வாக்குறுதிகளை அளித்து, பெரும்பாலும் சமூக ஊடகங்கள் வழியாக இந்தியக் குடிமக்களை தென்கிழக்கு ஆசிய நாடுகளுக்கு ஈர்த்துச் செல்லும் சந்தேகத்திற்குரிய நிறுவனங்கள் குறித்த சம்பவங்களை ஒன்றிய அரசு கவனத்தில் எடுத்துக்கொண்டுள்ளது. இதுவரை கம்போடியா, மியான்மர் மற்றும் லாவோஸ் ஆகிய நாடுகளில் இருந்து 6,700க்கும் மேற்பட்ட இந்தியர்கள் மீட்கப்பட்டுள்ளனர் என்று மாநிலங்களவையில் எழுப்பப்பட்ட ஒரு கேள்விக்கு எழுத்துப்பூர்வமாக அளித்த பதிலில் வெளியுறவுத்துறை இணையமைச்சர் கீர்த்தி வர்தன் சிங் தெரிவித்தார்.

* எத்தனால் கலந்த பெட்ரோல் விவசாயிகளுக்குப் பயனளிக்கிறது
எத்தனால் கலந்த பெட்ரோல் விவசாயிகளுக்குப் பெரும் பயனளித்துள்ளதுடன், 1.40 லட்சம் கோடி ரூபாய்க்கும் அதிகமான அந்நியச் செலாவணியைச் சேமிக்க வழிவகுத்துள்ளது என்று மக்களவையில் சாலைப் போக்குவரத்து மற்றும் நெடுஞ்சாலைத் துறை அமைச்சர் நிதின் கட்கரி தெரிவித்தார். அவர் மேலும் கூறுகையில்,’ விரிவான சோதனைகளுக்குப் பிறகு, எத்தனால் கலந்த பெட்ரோல் பயன்படுத்தப்படும் கார்களில் எந்தவிதமான பாதகமான பாதிப்பும் கண்டறியப்படவில்லை. இ-20 பெட்ரோல் (எத்தனால் கலந்த பெட்ரோல்) பயன்பாடு ஒரு ஆரோக்கியமான போக்காகும். இது ஒரு பசுமை மாற்றமாகும். இது குறைந்த மாசுபாட்டை ஏற்படுத்துகிறது. பெட்ரோலில் எத்தனால் கலப்பதால், எத்தனால் தயாரிப்பில் பயன்படுத்தப்படும் கரும்பு, மக்காச்சோளம் போன்ற மூலப்பொருட்களுக்காக விவசாயிகளுக்கு 40,000 கோடி ரூபாய் வழங்கப்பட்டுள்ளது’ என்றார்.

* வந்தே மாதரத்திற்கு தேசிய கீதத்திற்கு இணையான அந்தஸ்து வழங்க வேண்டும்
தேசியப் பாடலான வந்தே மாதரம் தேசியவாதத்துடன் தொடர்புடையது. அந்த பாடலுக்கு தேசிய கீதத்திற்கும் தேசியக் கொடிக்கும் வழங்கப்படும் அதே அந்தஸ்தை அதற்கும் வழங்குவதற்கு நாடு உறுதியேற்க வேண்டும் என்று ஒன்றிய அமைச்சர் ஜே.பி. நட்டா மாநிலங்களவையில் வலியுறுத்தினார். வந்தே மாதரத்தின் 150-வது ஆண்டு விழா குறித்த விவாதத்தை முடித்து வைத்துப் பேசிய மாநிலங்களவையின் அவை முன்னவரான நட்டா கூறுகையில்,’ இந்த விவாதத்தின் நோக்கம் முன்னாள் பிரதமர் ஜவஹர்லால் நேருவைக் களங்கப்படுத்துவது அல்ல, மாறாக இந்தியாவின் வரலாற்றை சரியாகப் பதிவு செய்வதுதான்.

எப்போதெல்லாம் ஒரு சம்பவம் நடக்கிறதோ, அப்போது அதன் பொறுப்பு தலைவரையே சாரும். அந்த நேரத்தில் ஜவஹர்லால் நேருதான் காங்கிரஸ் கட்சியின் தலைவராக இருந்தார். எனவே தான் வந்தே மாதரத்திற்கு வழங்கப்பட வேண்டிய மரியாதையும் அந்தஸ்தும் கிடைக்கவில்லை என்றும், அதற்கு அந்த நேரத்தில் ஆட்சியில் இருந்தவர்களே முழுப் பொறுப்பு என்றும் நான் முழுப் பொறுப்புணர்வோடு கூற விரும்புகிறேன்’ என்றார். அப்போது குறுக்கிட்ட எதிர்க்கட்சித் தலைவர் மல்லிகார்ஜுன கார்கே, இந்த விவாதம் நேருவைப் பற்றியதா அல்லது வந்தே மாதரத்தைப் பற்றியதா என்று கேள்வி எழுப்பினார். இதனால் ஆளும் தரப்புக்கும், எதிர்தரப்புக்கும் இடையே காரசார விவாதம் நடந்தது.

* உலக காற்று தரத்தை இந்தியா பின்பற்றாது
பல்வேறு அமைப்புகளால் மேற்கோள் காட்டப்படும் உலகளாவிய காற்றுத் தரவரிசைகள் எந்தவொரு அதிகாரப்பூர்வ அமைப்பாலும் நடத்தப்படவில்லை என்றும், உலக சுகாதார அமைப்பின் காற்றுத் தர வழிகாட்டுதல்கள் வெறும் ஆலோசனை மதிப்புகளாக மட்டுமே செயல்படுகின்றன, அவை கட்டாயத் தரநிலைகள் அல்ல. இந்தியா தனது சொந்த தரநிலைகளை மட்டுமே பின்பற்றுகிறது என்று சுற்றுச்சூழல் துறை இணையமைச்சர் கீர்த்தி வர்தன் சிங் தெரிவித்தார்.