ஈரோடு, நவ. 8: பட்டாசுகள் வெடிப்பதால் காற்று மாசுபடுவதை தடுக்கும் வகையில் பட்டாசுகள் வெடிக்கும் நேரத்தை வரைமுறை படுத்தி அண்மையில் சுப்ரீம் கோர்ட் உத்தரவிட்டது. இதன்படி தமிழகத்தில் தீபாவளியன்று காலை 6 மணி முதல் 7 மணி வரையிலும், மாலை 7 மணியில் இருந்து 8 மணி வரை பட்டாசு வெடிக்க தமிழக அரசு நேரம் அறிவித்திருந்தது. அனுமதிக்கப்பட்ட நேரத்தை தாண்டி பட்டாசுகள் வெடிப்பவர்களை கண்காணிக்க போலீசார்க்கு உத்தரவிடப்பட்டிருந்தது. இந்நிலையில் ஈரோடு மாவட்டத்தில் தீபாவளியன்று அனுமதி வழங்கப்பட்ட நேரத்திற்கு பதிலாக பகல் நேரத்தில் பட்டாசு வெடித்ததாக 18 பேர் மீது போலீசார் வழக்கு பதிவு செய்து கைது செய்தனர்.
இதன்படி ஈரோடு வடக்கு காவல்நிலையத்தில் 2 வழக்குகளில் 3 பேரும், ஈரோடு தெற்கு, கருங்கல்பாளையம், பவானி, சித்தோடு, கவுந்தப்பாடி, பங்களாப்புதூர், சத்தி, புளியம்பட்டி, பெருந்துறை ஆகிய காவல் நிலையங்களில் தலா 1 வழக்குகளும், கோபி காவல் நிலையத்தில் 3 வழக்குகளில் 6 பேர் என மொத்தம் 14 வழக்குகள் பதிவு செய்யப்பட்டு, 18 பேரை போலீசார் கைது செய்துள்ளனர்.