சின்னமனூர், பிப். 28: சின்னமனூரில் காலை, மாலை பள்ளி நேரங்களில் போக்குவரத்து நெரிசல் ஏற்பட்டு, வாகன ஓட்டிகளும், பொதுமக்களும் அவதிப்படுகின்றனர். இதை முறைப்படுத்த போக்குவரத்து போலீசார் பிரிவை உருவாக்க வேண்டும் என சமூக ஆர்வலர்கள் கோரிக்கை விடுத்துள்ளனர். தேனி மாவட்டத்தில் திண்டுக்கல்-குமுளி தேசிய நெடுஞ்சாலையில் சின்னமனூர் நகராட்சி உள்ளது. இரண்டாம் நிலை நகராட்சியான இங்கு 27 வார்டுகள் உள்ளன. இந்த நகரைச் சுற்றி 14 கிராம ஊராட்சிகள், 3 பேரூராட்சிகள் உள்ளன. இப்பகுதியில் சுமார் 3 லட்சம் பேர் வசிக்கின்றனர். மேலும், ஹைவேவிஸ் மேகமலை உள்ளிட்ட 7 மலைக்கிராமங்களும் உள்ளன. இப்பகுதியில் ஏற்படும் சட்டம், ஒழுங்கு மற்றும் போக்குவரத்து பிரச்னைகளை கண்காணிக்க சின்னமனூரில் காவல்நிலையம் உள்ளது. இந்த காவல்நிலையத்தில் இன்ஸ்பெக்டர், 2 சப்இன்ஸ்பெக்டர், 4 சிறப்பு எஸ்ஐ, போலீஸ்காரர்கள் என 35க்கும் மேற்பட்டோர் பணிபுரிகின்றனர். இந்நிலையில், வாகனப் பெருக்கத்தால் நகரில் போக்குவரத்து நெரிசல் அதிகரித்து வருகின்றது.