நாகை,பிப்.19: நாகை மாவட்டத்தில் 284 நேரடி நெல் கொள்முதல் நிலையங்கள் வாயிலாக 1 லட்சத்து 18 ஆயிரம் மெட்ரிக் டன் நெல் கொள்முதல் செய்யப்பட்டுள்ளது என்று தமிழ்நாடு நுகர்பொருள் வாணிபக்கழக முதுநிலை மண்டல மேலாளர் சண்முகநாதன் தெரிவித்துள்ளார்.நாகை மாவட்டத்தில் தமிழ்நாடு நுகர்பொருள் வாணிப கழகம் மூலமாக நாகை, கீழ்வேளூர், திருக்குவளை, வேதாரண்யம் ஆகிய தாலுகாக்களில் 137 நேரடி நெல் கொள்முதல் நிலையங்களும், மயிலாடுதுறை, குத்தாலம், தரங்கம்பாடி, சீர்காழி ஆகிய தாலுகாக்களில் 147 நேரடி நெல் கொள்முதல் நிலையங்கள் என மாவட்டத்தில் மொத்தம் 284 நேரடி நெல் கொள்முதல் நிலையங்கள் திறக்கப்பட்டுள்ளது. விசாயிகளிடம் இருந்து நெல் மூட்டைகள் கொள்முதல் செய்யப்பட்டு வருகின்றன. கடந்த 15ம் தேதி வரை நேரடி நெல் கொள்முதல் நிலையங்கள் மூலமாக 1 லட்சத்து 18 ஆயிரத்து 133 மெட்ரிக் டன் நெல் கொள்முதல் செய்யப்பட்டுள்ளது.