நாகர்கோவில், பிப்.18: சம்பள உயர்வு வழங்க கோரி, குமரி மாவட்ட அரசு ரப்பர் தோட்ட தொழிலாளர்கள் வேலை நிறுத்த போராட்டம் நேற்று தொடங்கியது.குமரி மாவட்ட அரசு ரப்பர் கழகத்தில் பால் வடிக்கும் பணி, தொழிற்கூடம் உள்ளிட்டவற்றில் சுமார் 3 ஆயிரம் தொழிலாளர்கள் பணியாற்றி வருகிறார்கள். இந்த தொழிலாளர்களுக்கு 3 ஆண்டுகளுக்கு ஒருமுறை சம்பள உயர்வு அளிக்கப்பட வேண்டும். அந்த வகையில் கடந்த 1.12.2016 முதல் சம்பள உயர்வு வழங்க வேண்டும். இதற்காக 47 முறை பேச்சுவார்த்தை நடந்தும், தோல்வியில் தான் முடிவடைந்துள்ளது. 2016ம் ஆண்டு சம்பள உயர்வு ஒப்பந்தமே முடிவடையாத நிலையில், 2019 ல் சம்பள உயர்வுக்கான பேச்சு வார்த்தை தொடங்கப்பட்டு இருக்க வேண்டும். ஆனால் அதுவும் இல்லை. இதனால் ரப்பர் தோட்ட தொழிலாளர்கள் மிகுந்த அதிருப்தியில் உள்ளனர். பலமுறை அரசின் கவனத்துக்கு கொண்டு சென்றும், இந்த கோரிக்கை கண்டு கொள்ளப்பட வில்லை. எனவே பிப்ரவரி 17ம் தேதி முதல் மீண்டும் காலவரையற்ற வேலை நிறுத்த போராட்டத்தில் ஈடுபட போவதாக தொழிற்சங்கங்கள் தெரிவித்து இருந்தன. அதன்படி நேற்று (17ம் தேதி) காலை வேலை நிறுத்த போராட்டம் தொடங்கியது. இந்த வேலை நிறுத்தம் காரணமாக ரப்பர் பால் வெட்டுதல், தொழிற்கூட பணிகள் அனைத்தும் அடியோடு முடங்கின. இதனால் அரசுக்கு பல கோடி ரூபாய் நஷ்டம் ஏற்படும் நிலை உள்ளது.