சோழவந்தான், அக். 15: மதுரை மாவட்டம் சோழவந்தான் அருகே கோயிலில் திருடு போன இரண்டு ஐம்பொன் சிலைகளை நேற்று போலீசார் மீட்டு, திருடிய வாலிபரை கைது செய்தனர். மதுரை மாவட்டம், சோழவந்தான் அருகே விக்கிரமங்கலத்தை அடுத்த வி.கோவில்பட்டியில் சுமார் 1200 ஆண்டுகள் பழமையான மருதோதய ஈஸ்வரமுடையார் சமேத சிவனேசவல்லி கோயில் உள்ளது. இங்கு கடந்த மாதம் 9ம் தேதி பொதுமக்கள் பங்களிப்புடன் ஒன்றே முக்கால் அடி சிவன், பார்வதி ஆகிய இரு உற்சவர் ஐம்பொன் சிலைகள் பிரதிஷ்டை செய்யப்பட்டு வழிபாடு நடைபெற்று வந்தது. இந்நிலையில் கடந்த 12ம் தேதி இரவு, கோயிலின் பின்புற சுவர் ஏறி குதித்து மர்மநபர் உள் பிரகாரத்தின் பூட்டை உடைத்து இரு ஐம்பொன் சிலைகளையும் திருடி சென்றார். இது குறித்து விக்கிரமங்கலம் போலீசார் வழக்குப்பதிவு செய்து விசாரணை நடத்தி வந்தனர்.