நாகர்கோவில், டிச.12 : சபரிமலை விவகாரத்தில் போராட்டம் நடத்திய பா.ஜ.வினர் மீது தடியடி நடத்தப்பட்ட சம்பவத்தை கண்டித்து திருவனந்தபுரத்தில் நேற்று முழு அடைப்பு போராட்டம் நடந்தது. இந்த போராட்டத்தையொட்டி பஸ் போக்கு வரத்து பாதிக்கப்பட்டது. இதனால் நாகர்கோவிலில் இருந்து திருவனந்தபுரம் செல்ல வேண்டிய தமிழ்நாடு அரசு பஸ்கள் களியக்காவிளை வரை மட்டுமே சென்று திரும்பின. இதே போல் திருவனந்தபுரத்தில் இருந்தும் கேரள அரசு பஸ்கள் நாகர்கோவில் வர வில்லை. கேரளா செல்ல வேண்டிய தனியார் வாகனங்கள், லாரிகள் மாவட்ட எல்லையான களியக்காவிளை, மார்த்தாண்டம் மற்றும் ஆரல்வாய்மொழி பகுதிகளில் சாலை ஓரங்களில் நிறுத்தி வைக்கப்பட்டு, பின்னர் மாலையில் புறப்பட்டு சென்றன. திருவனந்தபுரத்துக்கு பஸ்கள் செல்லாததால், ரயில்களில் அதிகளவில் கூட்டம் இருந்தது.