ஈரோடு: ரூ.50 ஆயிரத்திற்கு மேல் எடுத்துவர தேர்தல் ஆணையம் தடை விதித்துள்ளதால் ஈரோடு கருங்கல்பாளையம் மாட்டு சந்தையில் மாடுகள் விற்பனை பாதியாக குறைந்தது. ஈரோடு கருங்கல்பாளையம் சோதனைசாவடி அருகே வாரந்தோறும் வியாழன் அன்று மாட்டு சந்தை நடைபெறும். ஈரோடு மற்றும் சுற்றுப்புற பகுதிகள், சேலம், நாமக்கல், கரூர் போன்ற இடங்களில் இருந்து மாடுகள் விற்பனைக்கு கொண்டு வரப்படும். இதை கேரளா, கர்நாடகா, ஆந்திரா, தெலங்கானா, மகாராஷ்டிரா ஆகிய மாநிலங்களை சேர்ந்த வியாபாரிகள் வந்து வாங்கி செல்வது வழக்கம். தமிழகம், கேரளா மாநிலங்களில் சட்டமன்ற தேர்தல் நடைபெற உள்ளதையொட்டி, தேர்தல் நடத்தை விதிமுறைகள் அமல்படுத்தப்பட்டு ரூ.50 ஆயிரத்திற்கு மேல் கையில் பணம் எடுத்து செல்லக்கூடாது என அறிவுறுத்தப்பட்டு உள்ளது.