டெஸ்ட் போட்டியில் பேட்டிங் என்றாலே மணிக் கணக்கில் டொக்கு வைத்து நங்கூரம் பாய்ச்சி நிற்பது என்ற கான்செப்டை உடைத்தவர்களில் முன்னோடி என்றால் அது வெஸ்ட் இண்டீசின் சர் விவியன் ரிச்சர்ட்ஸ் தான். ஆன்டிகுவா, செயின்ட் ஜான்ஸ் மைதானத்தில் 1986ம் ஆண்டு ஏப்ரல் 15ம் தேதி இங்கிலாந்துக்கு எதிராக நடந்த டெஸ்டில், ரிச்சர்ட்ஸ் 56 பந்தில் சதம் விளாசி அசத்தினார். டெஸ்ட் போட்டிகளில் அதிவேக சதமாக உலக சாதனை படைத்த இந்த ஆட்டம் ஏறக்குறைய 30 ஆண்டுகளுக்கு நிலைத்து நின்றது. 2016ல் நியூசிலாந்தின் பிரெண்டன் மெக்கல்லம் இந்த சாதனையை முறியடித்தார்.