இந்தியாவின் எம்பிவி ரக கார் மார்க்கெட்டில் தன்னிகரற்ற மாடலாக டொயோட்டா இன்னோவா க்ரிஸ்ட்டா விளங்குகிறது. இந்நிலையில், கியா கார்னிவல், மாருதி எர்டிகா கார்களால் இன்னோவா க்ரிஸ்ட்டா காருக்கு சற்று நெருக்கடி ஏற்பட்டுள்ளது. இதை சமாளிக்க டொயோட்டோ நிறுவனம் அடுத்தக்கட்ட நகர்வை துவக்கியுள்ளது. வாடிக்கையாளர்களின் கவனத்தை ஈர்க்கும் விதத்திலும், கூடுதல் மதிப்பை வழங்கும் விதத்திலும் அதிக சிறப்பம்சங்கள் கொண்ட விசேஷ மாடலை டொயோட்டா கொண்டுவர இருக்கிறது. டொயோட்டா இன்னோவா க்ரிஸ்ட்டா காரின் விஎக்ஸ் வேரியண்ட்டில் கூடுதல் சிறப்பம்சங்கள் சேர்க்கப்பட்டு ‘’லீடர்ஷிப் எடிசன்’’ என்ற பெயரில் சந்தையில் அறிமுகம் செய்யப்பட இருக்கிறது. இந்த மாடலானது இரட்டை வண்ணக் கலவையில் வர இருக்கிறது. கருப்பு வண்ணத்திலான கூரையுடன் வெள்ளை மற்றும் சிவப்பு வண்ணங்களில் கிடைக்கும். எல்இடி புரொஜெக்டர் ஹெட்லைட், இரட்டை வண்ணத்திலான அலாய் வீல், ரியர் ஸ்பாய்லர், சைடு ஸ்கர்ட், முன்புற பம்பருக்கான கூடுதல் லிப் ஆக்சஸெரீஸ் கொடுக்கப்பட்டுள்ளது. லீடர்ஷிப் எடிசன் மாடலுக்குரிய விசேஷ பேட்ஜ் பட்டைகளும் காரின் பின்புறத்தில் இடம்பெற்றுள்ளது.