திருவனந்தபுரம்: எஸ்.ஐ. வில்சன் கொலை செய்யப்பட்ட வழக்கில் கைது செய்யப்பட்ட 2 தீவிரவாதிகளை போலீசார் கேரளாவிற்கு அழைத்து சென்று விசாரணை மேற்கொண்டு வருகிறார்கள். அப்போது சாக்கடையில் வீசப்பட்ட துப்பாக்கி மற்றும் தோட்டாக்களை போலீசார் மீட்டுள்ளனர். கன்னியாகுமரி மாவட்டம் களியக்காவிளை உதவி ஆய்வாளர் வில்சன் கடந்த 8ம் தேதி இரவு சுட்டுக்கொல்லப்பட்டார். இவரை சுட்டு கொன்றதாக அப்துல் சமீம் மற்றும் தவ்பீக் ஆகியோரை காவல்துறையினர் கைது செய்தனர். கைது செய்யப்பட்ட அவர்கள், நீதிமன்ற உத்தரவின்படி 10 நாள் போலீஸ் காவலில் வைத்து விசாரிக்க அனுமதிக்கப்பட்டதன் பேரில், கடந்த 2, 3 நாட்களாக அவர்களிடம் விசாரணை நடைபெற்று வருகிறது. வில்சன் கொலை நடந்ததற்கு முழு திட்டமும் கேரளாவில் நடைபெற்றுள்ளது என கருதப்படுவதால் தீவிரவாதிகள் இருவரையும் தனிப்படை போலீசார் கேரளாவிற்கு அழைத்து சென்றுள்ளார்கள். அவர்களிடம் நடத்தப்பட்ட விசாரணையில், கேரளா மாநிலம் எர்ணாக்குளம் பேருந்து நிலையம் அருகிலுள்ள கழிவுநீர் ஓடையில் எஸ்.ஐ. வில்சனை சுட்டு கொல்ல பயன்படுத்தப்பட்ட துப்பாக்கி மற்றும் தோட்டாக்கள் வீசி இருப்பதாக தெரிவித்துள்ளனர்.