புதுடெல்லி: பேரறிவாளன் மனு தொடர்பாக, தமிழக அரசு 2 வாரத்தில் பதிலளிக்க வேண்டும் என உச்ச நீதிமன்றம் கூறியுள்ளது.முன்னாள் பிரதமர் ராஜிவ் காந்தி கொலை வழக்கில் ஆயுள் தண்டனை அனுபவித்து வரும் பேரறிவாளன் தனக்கு விதிக்கப்பட்ட தண்டனையை நிறுத்தி வைக்கக் கோரி உச்ச நீதிமன்றத்தில் மனுத்தாக்கல் செய்தார். அதில், ‘பெல்ட் வெடிகுண்டில் வைக்கப்பட்ட பேட்டரி, நான் வாங்கி கொடுத்தது என்ற குற்றச்சாட்டு நிரூபிக்கப்படாத நிலையில் எனக்கு அளிக்கப்பட்ட தண்டனையை நிறுத்தி வைக்க வேண்டும்’ என்று கோரி இருந்தார். இவ்வழக்கு உச்ச நீதிமன்ற நீதிபதி நாகேஸ்வர ராவ் தலைமையிலான அமர்வு முன்பு கடந்த சில வாரங்களுக்கு முன் விசாரணைக்கு வந்தது. அப்போது, ‘பெல்ட் வெடிகுண்டு தொடர்பாக சி.பி.ஐ. சிறப்பு குழு தாக்கல் செய்த விசாரணை அறிக்கை, ஏற்கனவே தாக்கல் செய்த அறிக்கை போல் உள்ளது. எந்த ஒரு புதிய விஷயமும் தற்போதைய அறிக்கையில் இல்லை’ என்று நீதிமன்றம் தெரிவித்தது.