தூத்துக்குடி: தூத்துக்குடியில் சினிமாவை மிஞ்சும் வகையில் காவல் நிலையம் அருகிலேயே ரியல் எஸ்டேட் அதிபர் வெட்டிக் கொலை செய்யப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது. தூத்துக்குடி மாவட்டம் நெல்லை பாளையங்கோட்டை கே.டி.சி நகரை சேர்ந்தவர் சிவகுமார். இவர் ரியல் எஸ்டேட் தொழில் செய்து வருவதாக கூறப்படுகிறது. மேலும் இவர் மீது கொலை வழக்கு ஒன்று நிலுவையில் இருப்பதாகவும், பல்வேறு நிலையில் தொழில் போட்டி இருந்ததாகவும் கூறப்படுகிறது. இந்த நிலையில் இன்று காலை தூத்துக்குடி தென்பாகம் காவல் நிலையம் அருகே உள்ள தனது அண்ணன் முத்துக்குமார் அலுவலகத்திற்கு சென்றுவிட்டு சிவகுமார் திரும்பியுள்ளார். அப்போது அங்கிருந்த ஆட்டோவில் இருந்த சிலர் கொடுத்த தகவலின் பேரில் 5 இருசக்கர வாகனங்களில் அடையாளம் தெரியாத மர்மநபர்கள் வந்ததாகவும், அவர்கள் சிவகுமாரை சரமாரியாக வெட்டிவிட்டு கண்ணிமைக்கும் நேரத்தில் தப்பி ஓடியதாகவும் கூறப்படுகிறது.