சென்னை: வாகா எல்லையில் ராணுவ வீரர்களை சந்தித்தார் நடிகர் அஜித். பல கிலோ மீட்டர் தூரம் பைக்கில் பயணம் செல்வது அஜித்தின் ஹாபி. சமீபகாலமாக இதுபோன்ற பயணத்தில் அவர் அதிகம் கவனம் செலுத்தி வருகிறார். வலிமை படத்திற்காக ரஷ்யாவுக்கு சென்றபோது, அங்கு பைக்கில் பல்வேறு இடங்களுக்கு பயணமானார். அதற்கு முன்பாக இந்தியாவில் குஜராத், அதையொட்டிய கிராமங்களுக்கு சென்று வந்தார். பிறகு மத்திய பிரதேசத்திலும் பைக் பயணம் மேற்கொண்டார். இந்நிலையில் கடந்த 10 நாட்களுக்கு முன்பாக அவர் பைக்கில் நேபாளத்துக்கு புறப்பட்டு சென்றார். காத்மண்டு சென்றவர் பின்னர் அங்கிருந்து இந்தியா - பாகிஸ்தான் எல்லையான வாகாவுக்கு நேற்று முன்தினம் சென்றார். அஜித்தை பார்த்ததும் ராணுவ வீரர்கள் மகிழ்ச்சி அடைந்தனர். அவரை வரவேற்று தங்கள் இருப்பிடத்துக்கு அழைத்து சென்றனர். அங்கு அஜித்துடன் நீண்ட நேரம் ராணுவ வீரர்கள் உரையாடினர். பிறகு அவருடன் புகைப்படங்கள் எடுத்துக்கொண்டனர்.