கொடைக்கானல்: கொடைக்கானல் மலைப்பகுதியில் நடந்த கணக்கெடுப்பில் 200க்கும் அதிகமான பறவை இனங்கள், 25 அரிய வகை பறவை இனங்கள் இருப்பது தெரியவந்துள்ளது. திண்டுக்கல் மாவட்டம், கொடைக்கானல் அருகே உள்ள வனப்பகுதியில் ஏராளமான பறவைகள் வசித்து வருகின்றன. இந்நிலையில் கொடைக்கானல் வனக்கோட்டத்துக்குட்பட்ட 7 வனச்சரகங்களில் வனத்துறை சார்பில் பறவைகள் கணக்கெடுக்கும் பணி நடந்தது. இதன்படி கொடைக்கானல் வனச்சரகம், பேரிஜம் வனச்சரகம், மன்னவனூர் வனச்சரகம், பூம்பாறை வனச்சரகம், பெரும்பள்ளம் வனச்சரகம், தேவதானப்பட்டி, பழனி ஆகிய வனச்சரகங்களில் 27க்கும் மேற்பட்ட இடங்களில் இப்பணி நடந்தது. இதில் கொடைக்கானல் வனச்சரக மாவட்ட வன அலுவலர் யோகேஷ்குமார் மீனா, ரேஞ்சர்கள் மனோஜ்குமார், சுரேஷ், குமரேசன், திருநிறை செல்வன், அன்பழகன், வனவர்கள், வனக்காப்பாளர்கள், இந்தியா முழுவதும் இருந்து வந்திருந்த பறவை ஆய்வாளர்கள், கொடைக்கானல் அரசு பெண்கள் கலை அறிவியல் கல்லூரி மாணவிகள் மற்றும் வனத்துறை சார்பில் ஒரு அலுவலரும், புகைப்படக் கலைஞர் ஒருவரும் ஈடுபட்டனர்.

கொடைக்கானல் வனக்கோட்டத்திற்குட்பட்ட 27 பகுதிகளில் 27 குழுவினராக கணக்கெடுப்பில் ஈடுபட்டனர். குறிப்பாக நவீன தொழில்நுட்பங்களை பயன்படுத்தி நீர் நிலை பறவைகள், நில பறவைகள் குறித்தும் மற்றும் இரவு நேர பறவைகள் குறித்து கணக்கெடுக்கப்பட்டது. இந்த கணக்கெடுப்பின்படி கொடைக்கானல் வனப்பகுதிகளில் 200 வகையான பறவை இனங்கள் உள்ளதும், கொடைக்கானல் மலைப்பகுதியில் 3,500க்கும் மேற்பட்ட பறவைகள் வசித்து வருவதும் தெரியவந்துள்ளது. வேறு எந்த மலைப்பகுதிகளிலும் இல்லாத அரிய பறவை இனங்களான கிரே ஹெட்டட் கென்னறி, பிளை கேட்சிங், பிளாக் அண்ட் ஆரஞ்சு பிளை கேட்சிங், யுரேஷியன் பிளாக் பேர், கமிட்டர் வாபுலர், நீலகிரி பிளை கேட்சிங், ஓரியண்டல் ஒயிட் ஐ, பழனி லாபிங் திரஸ், பார்விங் பிளை கேட்சர், ஸ்டிக்கில்டு ப்ளூ பிளை கேட்ச்சர், ரஸ்டி டைல்டு பிளைட் கேட்ச்சர் உள்ளிட்ட 25 அரிய வகை பறவையினங்கள் கண்டறியப்பட்டுள்ளன. இது குறித்து கொடைக்கானல் வனத்துறை ரேஞ்சர் மனோஜ்குமார் கூறுகையில், ‘‘கொடைக்கானல் வனப்பகுதியில் பறவை இன பெருக்கம் நன்றாக உள்ளது. அழிந்து வரும் பறவை இனங்களை பாதுகாப்பதற்கு வனத்துறை நடவடிக்கை எடுத்து வருகிறது’’ என்றார்.

 

The post கொடைக்கானல் வனப்பகுதியில் 25 அரிய வகை பறவைகள் கண்டுபிடிப்பு appeared first on Dinakaran.