இங்குள்ள ஏரிக்கு ஏற்கெனவே உபரிநீர் கால்வாய்கள் மூலமாக நீர்வரத்து இருந்துள்ளது. அதன்மூலம் இப்பகுதி மக்கள் விவசாயப் பணிகளில் ஈடுபட்டுள்ளனர். நாளடைவில் பாலாபுரம் ஏரிக்கு வரும் உபரிநீர் கால்வாய்கள் அனைத்தும் முறையான பராமரிப்பின்றி, முட்புதர் காடுகளாக மாறி முற்றிலும் சேதமடைந்துள்ளது. இதனால் பாலாபுரம் ஏரிக்கு நீர்வரத்து வெகுவாக குறைந்துவிட்டது. இதன் காரணமாக அப்பகுதி மக்கள் நெல், கரும்பு, வேர்க்கடலை, உளுந்து போன்ற உணவு தானியங்களை விளைவிக்க முடியாமல் பெரிதும் அவதிப்பட்டு வருகின்றனர். இதனால், அப்பகுதி மக்களின் அன்றாட இயல்பு வாழ்க்கையும், பொருளாதார வசதியும் முற்றிலும் முடங்கிவிட்டன.
இதுகுறித்து ஊராட்சி, ஒன்றிய அதிகாரிகளிடம் பலமுறை புகார் தெரிவித்தும், ஏரிக்கு வரும் உபரிநீர் கால்வாய்களை சீரமைக்க இதுவரை எவ்வித நடவடிக்கையும் எடுக்கப்படவில்லை என்று கூறப்படுகிறது. எனவே, ஆர்.கே.பேட்டை ஒன்றியத்தில் அடங்கிய பாலாபுரம் ஏரிக்கு வரும் உபரிநீர் கால்வாய் அனைத்திலும் படர்ந்துள்ள முட்புதர்களை அகற்றி தூர்வாரி சீரமைத்து, இப்பகுதி மக்களின் நீராதாரத்துக்கு விரைவில் பயன்படுத்த மாவட்ட கலெக்டர் மற்றும் சம்பந்தப்பட்ட துறை உயர் அதிகாரிகள் உரிய நடவடிக்கை எடுக்க வேண்டும் என்று கிராம மக்கள் வலியுறுத்துகின்றனர்.
The post பாலாபுரம் கிராமத்தில் புதர் மண்டி காணாமல் போன கால்வாய்: சீரமைக்க வலியுறுத்தல் appeared first on Dinakaran.