*ஒரே குடும்பத்தை சேர்ந்த 3 பேர் கைது

கும்பகோணம் : கும்பகோணம் அருகே தேனாம்படுகையில் வீட்டில் கோழி அடைந்த தகராறில் முதியவர் அடித்து கொலை செய்யப்பட்டார். இதுதொடர்பாக ஒரே குடும்பத்தை சேர்ந்த 3 பேர் நேற்று கைது செய்யப்பட்டனர்.தஞ்சாவூர் மாவட்டம் கும்பகோணம் அருகே தேனாம்படுகை வடக்கு தெருவை சேர்ந்தவர் முருகையன் (82).கோழிகளை வளர்த்து வரும் இவர், தனது வீட்டில் உள்ள கோழி அடைக்கும் இடத்திற்கு நேற்றுமுன்தினம் மாலை இவரது மற்றும் அதே தெருவை சேர்ந்த வீரமணி (60) என்பரது கோழியும் வந்து அடைந்துள்ளது. இதனை கண்ட மற்றொரு கோழியின் உரிமையாளர், வீரமணியின் மனைவி செல்வராணி (55), இவர்களது மகன்கள் பாபுராஜ் (32) மற்றும் பாரதி (20) ஆகியோர் முருகையன் வீட்டிற்கு வந்து கோழி உங்கள் வீட்டில் அடைந்துள்ளது என கேட்டுள்ளனர்.

அப்போது அந்த கோழியை தங்கள் வீட்டிற்கு செல்ல திறந்து விடக்கூறி வாக்குவாதத்தில் ஈடுபட்டுள்ளனர். அதற்கு எந்த கோழி உங்களது என்பது எனக்கு தெரியவில்லை. எனது மகன் வந்தவுடன் கேட்டு திறந்து விடுகிறேன் என்று முருகையன் கூறியுள்ளார். இதனால் இரு தரப்பினருக்கும் இடையே தகராறு ஏற்பட்டு கைகலப்பாக மாறியது. இதனால் ஆத்திரமடைந்த செல்வராணி, பாபுராஜ் மற்றும் பாரதி ஆகியோர் முருகையனை நெஞ்சில் தாக்கியதில் நிலை தடுமாறி கீழே விழுந்து மயக்கமானார்.

இதில் அதிர்ச்சியடைந்த அக்கம்பக்கத்தினர், முருகையனை மீட்டு பட்டீஸ்வரம் அரசு மருத்துவமனைக்கு கொண்டு சென்றனர். அங்கு பரிசோதனை செய்த டாக்டர்கள் அவரை மேல் சிகிச்சைக்காக கும்பகோணம் அரசு மாவட்ட தலைமை மருத்துவமனைக்கு அனுப்பி வைத்தனர். அங்கு பரிசோதனை செய்த டாக்டர்கள் முருகையன் ஏற்கனவே இறந்து விட்டதாக தெரிவித்தனர். இதுகுறித்து பட்டீஸ்வரம் போலீசார் வழக்கு பதிந்து செல்வராணி, பாபுராஜ் மற்றும் பாரதி ஆகியோரை நேற்று கைது செய்தனர்.

The post கும்பகோணம் அருகே வீட்டில் கோழி அடைந்த தகராறு முதியவர் அடித்து கொலை appeared first on Dinakaran.