நெல்லை: நெல்லை மேலப்பாளையத்தில், அமரன் திரைப்படம் ஓடும் தியேட்டரில் கடந்த 5 நாட்களுக்கு முன்பு அதிகாலை 2 மர்ம நபர்கள் பெட்ரோல் குண்டுகளை வீசிவிட்டு தப்பி சென்றனர். இதுகுறித்து மேலப்பாளையம் போலீசார் வழக்குப்பதிந்து சிசிடிவி காட்சிகளின் அடிப்படையில் விசாரணை நடத்தியபோது, 3 பேருக்கு தொடர்பு இருப்பது தெரியவந்தது. 3 தனிப்படை அமைத்து அவர்களை போலீசார் தேடி வந்தனர். மேலும் மதுரையில் இருந்து தென்மண்டல தீவிரவாத தடுப்பு பிரிவு எஸ்பி ரமேஷ் கண்ணா தலைமையிலான போலீசாரும் நெல்லையில் முகாமிட்டு விசாரித்து வருகின்றனர்.

இந்நிலையில் சந்தேகப்படும்படியான 3 நபர்களை மேலப்பாளையம் போலீசார் பிடித்து ரகசிய இடத்தில் விசாரணை நடத்தினர். அதில் ஒருவருக்கு இந்த பெட்ரோல் குண்டு வீச்சில் தொடர்பு இருப்பது தெரியவந்துள்ளது. அவரிடம், தலைமறைவாக உள்ள மற்ற 2 நபர்கள் குறித்து விசாரித்து வருகின்றனர். அவர் அளிக்கும் தகவலின் அடிப்படையில், பெட்ரோல் குண்டு வீசிய 2 பேர் யார் என்பது தெரியவரும். தீவிரவாத தடுப்பு பிரிவு போலீசார் 3 பேரையும் விரைவில் கைது செய்வர் என கூறப்படுகிறது.

The post நெல்லை தியேட்டரில் பெட்ரோல் குண்டு ஒருவர் சிக்கினார் appeared first on Dinakaran.