மன்னார்குடி, மார்ச் 2 : ஓய்வு பெறும் வயது 59ல் இருந்து 60 ஆக உயர்த்தியிருப்பதன் மூலம் இளைஞர்களின் வேலைவாய்ப்பு கனவாகிப் போகும் என்பதால் தமிழக அரசு தனது முடிவை மறுபரிசீலனை செய்ய வேண்டும் என தமிழ்நாடு ஆசிரியர் சங்கம் வலியுறுத்தி உள்ளது. இது குறித்து தமிழ்நாடு ஆசிரியர் சங்க மாநில தலைவர் இளமாறன் வெளியிட்டுள்ள அறிக்கை: அரசு ஊழியர்கள் பணி ஓய்வு வயது 59லிருந்து 60 ஆக மாற்றி ஓராண்டு நீட்டிப்பு வழங்கப்படும் என்று சட்டசபையில் முதல்வர் 110 விதியின் கீழ் அறிவித்துள்ளார். தமிழக அரசுப் பணியில் பணிபுரிந்து வரும் அலுவலர்கள், ஊழியர்கள் அரசுப் பள்ளி, கல்லூரிகள், பொது நிறுவன பணியாளர் அனைவருக்கும் பொருந்தும் என்று அறிவிக்கப்பட்டுள்ளது.
ஒருபுறம் ஆசிரியர்கள்-அரசு ஊழியர்களுக்கு சாதகமாக அமைந்துள்ளது. 45 வயதுக்கு பின் 57 வயது வரை பணி நியமனம் பெற்ற ஆசிரியர்களுக்கும் தற்போது அகவிலைப்படி, ஒன்றரை ஆண்டுக்கு ரத்து செய்யப்பட்டுள்ளதால் ஓராண்டு நீட்டிப்பினால் ஓய்வூதியம் குறைவை ஈடு செய்யலாம். ஆனால் பல லட்சம் இளைஞர்கள் படித்துவிட்டு வேலைக்காகக் காத்திருக்கும் நிலையே நிலவிவருகிறது.