தொன்மையும் பாரம்பரியமும் இணைந்த பரதநாட்டியக் கலையில் சிறந்து விளங்கும் இளம் கலைஞர் ஸ்ரீ மகாலட்சுமி, தன்னுடைய சிறுவயதிலேயே கலை மீது அதீத ஆர்வத்துடன் தனது நடன பயணத்தினை துவங்கியுள்ளார். தனது கட்டுப்பாடு, அர்ப்பணிப்பு மற்றும் விடாமுயற்சி ஆகியவற்றின் காரணமாக இன்று பல மேடைகளில் தனது நடனத் திறமையினை நிரூபித்து வருகிறார். எட்டாண்டுகளாக தொடர்ந்து பரதநாட்டியப் பயிற்சி பெற்று வரும் இவர், தன் குரு திருமதி பிரபாவதி அவர்களின் வழிகாட்டுதலின் கீழ் “ ஸ்ரீ மகாலட்சுமி நிருத்தியாலயா”வில் நடனக்கலையை எட்டு வருடங்களாக பயின்று வருகிறார். அவரது நடனத்தில் காணப்படும் அழகு, அசைவுகளின் துல்லியம் மற்றும் அபிநயத்தின் ஆழம் பார்வையாளர்களை பெரிதும் கவர்ந்து வருகிறது. இவரது நடன ஆர்வம் குறித்து நம்மிடம் பகிர்ந்து கொள்கிறார்.
நடன பயணங்கள் மற்றும் நாட்டிய ஆர்வம் குறித்து..
இளம் வயதிலேயே 50-க்கும் மேற்பட்ட சான்றிதழ்கள் பெற்றுள்ள இவர், பல்வேறு நடனப் போட்டிகள் மற்றும் மேடை நிகழ்ச்சிகளில் கலந்து கொண்டு 20-க்கும் மேற்பட்ட பதக்கங்கள் மற்றும் விருதுகளை வென்றுள்ள மகாலட்சுமி ஒவ்வொரு மேடையிலும் தன்னுடைய தனித்துவமான நடனத்தால் பலரது பாராட்டையும் பெற்றுள்ளார்.
நிகழ்ச்சிகளில் அவரது நம்பிக்கைமிகு மேடைநடை, சீரான அசைவுகள் மற்றும் உணர்வுகளை வெளிப்படுத்தும் திறன் இவரை மற்றவர்களிடமிருந்து தனித்துவமாக காட்டுகிறது என்பதே தனிச்சிறப்பு. இவர் நடன பயணத்தில் தனக்கென ஒரு பாணியை உருவாக்கி எதிர்காலத்தில் மேலும் பல உயரங்களை எட்டுவார் என்பது உறுதி.
இவரது பெற்றோர் பாலாஜி மற்றும் சுவாதிலட்சுமி அவர்கள், மகளின் திறமையை ஊக்குவித்து, தொடர்ந்து ஆதரித்து வருகின்றனர். அவர்களின் உறுதுணையும் உந்துதலுமே இவரது வளர்ச்சிக்கு மிகப்பெ`ரிய பலமாக இருந்து வருகிறது என்பதே நிஜம்.
கலை மீது கொண்ட அன்பும், தொடர்ந்து முயற்சி செய்யும் மனப்பாங்கும் இவரை இன்னும் உயர்ந்த நிலைக்கு கொண்டு செல்லும். ஸ்ரீ மகாலட்சுமி எதிர்காலத்தில் பரதநாட்டிய உலகில் ஒரு முக்கியமான கலைஞராக திகழ்வார் என்பதில் எந்த ஐயமும் இல்லை.
சாதனைகள்…
தென் இந்திய நடனத் திறமை (South India’s Dance Talent – Season 2)

இந்தப் போட்டியில் இவர் கலந்து கொண்டு தனது திறமையை வெளிப்படுத்தி, நடனத் திறமையின் அடிப்படையில் பாராட்டுச் சான்றிதழ் பெற்றுள்ளார். இப்போட்டி மாநில அளவிலான திறமைகளை வெளிக்கொணரும் முக்கியமான மேடையாகும்.
சர்வதேச அமைதி விருது (SPT International Peace Awards 2020):

சமூக விழிப்புணர்வு மற்றும் கலைத் திறனை மதிப்பிடும் வகையில் வழங்கப்பட்ட இந்தச் சான்றிதழ், இவரது திறமையையும் சமூக விழிப்புணர்வையும் வெளிப்படுத்துகிறது.
கலைத்திருவிழா – பள்ளிக் கல்வித் துறை (2025-2026)

தமிழ்நாடு அரசின் பள்ளிக் கல்வித் துறையின் கீழ் நடத்தப்பட்ட கலைத்திருவிழாவில் கலந்து கொண்டு பாராட்டுச் சான்றிதழ் பெற்றுள்ளார். இது பள்ளி மட்டத்திலான முக்கியமான கலை விழாவாகும்.
காஞ்சிபுரம் கல்வி நிகழ்ச்சி – பாராட்டு சான்றிதழ்:

காஞ்சிபுரம் மாவட்ட அளவில் நடைபெற்ற கலை நிகழ்ச்சியில் பங்கேற்று பாராட்டைப் பெற்றுள்ளார். இது அவரது மாவட்ட மட்ட திறமையை வெளிப்படுத்துகிறது.
கின்னஸ் சாதனை முயற்சி (366 நாட்கள் தொடர் நடன நிகழ்ச்சி)

பரதநாட்டியத் துறையில் 366 நாட்கள் தொடர்ந்து நடைபெற்ற கின்னஸ் சாதனை முயற்சியில் கலந்து கொண்டு பாராட்டு சான்றிதழ் பெற்றுள்ளார். இது அவரது அர்ப்பணிப்பு மற்றும் பொறுமையை வெளிப்படுத்துகிறது.
லிங்கன் புக் ஆஃப் ரெக்கார்ட்ஸ் (Lincoln Book of Records – 2022)

63 நாயன்மார்களை மையமாகக் கொண்டு 3 மணி நேரம் தொடர்ந்து நடைபெற்ற பரதநாட்டிய நிகழ்ச்சியில் கலந்து கொண்டு உலக சாதனை பதிவு செய்துள்ளார். இது அவரது மிகப்பெரிய சாதனைகளில் ஒன்றாகும்.

பாராட்டுகள் சான்றிதழ்கள் மற்றும்
விருதுகள்….

இளம் வயதிலேயே இவர்:

* 50-க்கும் மேற்பட்ட சான்றிதழ்கள் பெற்றுள்ளார்
* பல்வேறு நடன மேடைகளில் கலந்து கொண்டு அனுபவம் பெற்றுள்ளார்
* 20-க்கும் மேற்பட்ட பதக்கங்கள் மற்றும் விருதுகளை வென்றுள்ளார்.
* மாநில மற்றும் தேசிய அளவிலான பல்வேறு நாட்டிய நிகழ்ச்சிகளில் திறமையை வெளிப்படுத்தியுள்ளார்.
– தனுஜா ஜெயராமன்