ஈரோடு, பிப். 12: ஈரோடு ஜவுளி சந்தையில் கோடைகால ஜவுளி ரகங்கள் விற்பனை இந்த வாரம் முதல் தொடங்கி உள்ளதாக வியாபாரிகள் கூறியுள்ளனர். ஈரோடு ஜவுளி சந்தை வாரந்தோறும் செவ்வாய்கிழமை நடந்து வருகிறது. தமிழகம் மட்டுமின்றி அண்டை மாநிலங்களில் இருந்தும் ஏராளமான மொத்த வியாபாரிகள் கலந்து கொண்டு ஜவுளிகளை கொள்முதல் செய்கின்றனர். புத்தாண்டு, பொங்கல் பண்டிகை சீசன் விற்பனை முடிந்து கடந்த 3 வாரங்களாக மந்த நிலையில் இருந்து வந்தது. இந்நிலையில் இந்த வாரம் முதல் கோடை கால ஜவுளி ரகங்கள் விற்பனை தொடங்கி உள்ளதாக வியாபாரிகள் தெரிவித்துள்ளனர். மொத்த விற்பனை குறைந்த போதிலும் சில்லரை விற்பனை வழக்கம் போல நடைபெற்றதாக ஜவுளி வியாபாரிகள் கூறினர்.